Ministria e Brendshme ka publikuar Listën Përfundimtare të Zgjedhësve për zgjedhjet parlamentare më 11 maj 2025. Sipas Ministrisë së Brenshme nga të dhënat e gjeneruara nga Drejtoria e Përgjithshme e Gjendjes Civile kanë të drejtë të votojnë 3,713,761 shtetas shqiptarë brenda dhe jashtë vendit.
Sipas të dhënave:
– 114,642 zgjedhës votojnë për herë të parë;
– 1,081 shtetas të papërfshirë, për shkak të dekriminalizimit;
– 5,225 është numri i qendrave të votimit.
Lista përfundimtare e zgjedhësve është finalizuar nën mbikëqyrjen e adutitëve të Komisionit Qendror të Zgjedhjeve. Lista e zgjedhësve kaloi në disa faza në zbatim të dekretit të Presidentit Bajram Begaj, përmes publikimit të 3 ekstrakteve zgjedhore.
Për herë të parë në historinë e zgjedhjeve parlamentare në vend, listat zgjedhore përfshijnë dy kategori:
– Zgjedhësit që jetojnë brenda vendit;
– Zgjedhësit që jetojnë jashtë vendit.
Drejtoria e Përgjithshme e Gjendjes Civile në çdo bashki në vend po vijon me detyrimet për përgatitjen e infrastrukturës zgjedhore, ku qytetarët mund të aplikojnë apo rinovojnë Letërnjoftimet elektronike të skaduara, që duhet të përdoren për identifikimin e votuesve në zgjedhjet e 11 majit. Po ashtu, Ministria e Brendshme bën me dije se Drejtoria e Përgjithshme e Gjendjes Civile dhe kompania shtetërore e prodhimit të dokumenteve të identitetit “IdentiTek” mbeten të angazhuara në përmbushjen standardeve të këtij procesi të rëndësishëm.
