Administrata Trump po shqyrton zbatimin e kufizimeve të udhëtimit për 36 vende të tjera, përfshirë disa partnerë kryesorë të SHBA-së si Egjipti dhe Xhibuti, sipas një memoje të brendshme të parë nga The Washington Post.
Memoja, e nënshkruar nga Sekretari i Shtetit Marco Rubio dhe e dërguar diplomatëve amerikanë të shtunën, thotë se qeveritë e vendeve të listuara kanë 60 ditë për të përmbushur kërkesat e reja të përcaktuara nga Departamenti i Shtetit.
Departamenti i Shtetit pretendon se disa nga vendet e përmendura nuk kanë përmbushur standarde të ndryshme, të tilla si “asnjë autoritet qeveritar qendror kompetent ose bashkëpunues” për të ofruar dokumente të besueshme identiteti ose një numër të madh qytetarësh që kanë shkelur kushtet e vizave të tyre
Megjithatë, memoja përfshin një paralajmërim: nëse një vend është i gatshëm të pranojë shtetas të vendeve të treta që po largohen nga Shtetet e Bashkuara, do të ketë lehtësime.
Lista e vendeve që mund të përballen me kufizime vizash, ndalime udhëtimi ose kufizime të tjera përfshin 25 vende në Afrikë: Angola, Benini, Burkina Faso, Kepi i Gjelbër, Kameruni, Bregu i Fildishtë, Republika Demokratike e Kongos, Xhibuti, Etiopia, Egjipti, Gaboni, Gambia, Gana, Liberia, Malavi, Mauritania, Nigeri, Nigeria, Sao Tome dhe Principe, Senegali, Sudani i Jugut, Tanzania, Uganda, Zambia dhe Zimbabve.
Disa vende të Karaibeve janë gjithashtu në listë: Antigua dhe Barbuda, Dominica, Saint Kitts dhe Nevis dhe Saint Lucia.
Janë gjithashtu katër vende në Azi të listuara: Butani, Kamboxhia, Kirgistani dhe Siria; dhe tre vende në Oqeani: Tonga, Tuvalu dhe Vanuatu.
Këto vende kanë afat deri në orën 8 të mëngjesit të mërkurën për t’i paraqitur Departamentit të Shtetit një plan fillestar veprimi për të përmbushur kërkesat e reja.
