Banka e Shqipërisë ka nxjerrë një raport lidhur me ndërhyrjet në tregun e parasë dhe atë valuator përgjatë periudhës së tremujorit të dytë të këtij viti.
Sipas këtij raporti, injektimi mesatat ditor, ra lehtësisht në 26.93 miliardë lekë, krahasuar me tremujorin e parë që ishte 27.80 lekë.
Nga ana tjetër, për shkak të zhvlerësimit të euros, Banka e Shqipërisë, është detyruar të blejë valutë. Kështu, institucioni bleu në përmbushje të objektivave të politikës monetare ose të stabilitetit financiar në kundravleftën në lekë të 7.13 miliardë lekëve.
Në raport sqarohet se për shkak të përqendrimit të blerjeve në dy javët e fundit, ndikimi në rënien e mungesës pritet të reflektohet në tremujorin e tretë.
Sa i përket operacioneve strukturore për menaxhimin e likuiditetit të sistemit bankar dhe portofolit të
Bankës së Shqipërisë, në raport thuhet se përgjatë tremujorit të dytë, institucioni ka mbajtur portofolin të pandryshuar në nivelin 59.57 miliardë lekë.
“Vlera e portofolit të bonove të thesarit të Bankës së Shqipërisë, prej 59.57 miliardë lekësh, është niveli më i ulët prej vitit 2019 dhe, në terma relativë, kundrejt borxhit publik të emetuar në monedhën kombëtare, madhësia e portofolit është nën 8.00%, krahasuar me rreth 25% në fillim të viteve 2000”, sqaron Banka e Shqipërisë.
