Kreu i koalicionit “Nisma Shqipëria Bëhet”, Adriatik Lapaj ka denoncuar për shpifje, kreun e partisë “Mundësia”, Agron Shehajn. Kallëzimi është bërë sot në Strukturën e Posaçme kundër Korrupsionit dhe Krimit të Organizuar. Pasi ka depozituar kallëzimin, Lapaj ka dhënë një prononcim për mediat duke u shprehur se nuk e kishte kërkuar një konflikt me Shehajn, por shtoi se nuk mund të injoronte deklaratat e këtij të fundit në media dhe jo vetëm. Ndaj edhe kërkon që çështja mes të dyve të zgjidhet nga Gjykata e Posaçme kundër Korrupsionit dhe Krimit të Organizuar.
“Kam ardhur për Agron Shehajn. I kam dhënë kohë që të reflektojë sepse nuk e kam dashur këtë konflikt sepse i vetmi që fërkon barkun nga ky konflikt është Edi Rama. Por zoti Shehaj e kërkoi me qiri duke pretenduar se paskemi gjëra për të fshehur dhe e paskemi frikë. Unë nuk kam frikë nga Edi Rama dhe Sali Berisha, jo më nga Agroni. Por nuk kam dashur që të krijoj konflikt mes të resë. Por kur kërkon luftë, luftë do të ketë. Po dorëzoj padinë dhe zoti Shehaj duhet të vijë me dokumenta për të provuar pretendimet. Unë mbaj përgjegjësi të plotë. Nuk kam as unë, as nëna, as babai, asnjë metër tokë. Ka pretenduar se kam përfaqësuar kompani të krimit dhe kam marrë lekë nga kompania që janë sekuestruar nga SPAK. Ka pretenduar se kam përfaqësuar në Apel, çështje që në gjykatën e shkallës së parë vendimin e ka dhënë vjehërri im. Ndërkohë ftoj gazetarët që të gjejnë një çështje. Ka pretenduar se kam regjistruar në hipotekë një pronë që e ka dhënë vjehrri im. Ka pretenduar se unë kam kryer procedurat për një investim strategjik. Të dalin gazetarët dhe ta gjejnë një dokument. Sot jam i detyruar që të vij dhe njerëzit do thoshin ‘ç’ka Adriatiku?’. Ka 8 shpifje të bëra dhe të dokumentuara. Dosjen e kam punuar me rigorozitet dhe duhet që zoti Shehaj të vijë dhe të provojë shpifjet në Gjykatë,”-tha në fjalën e tij Lapaj.
