Gjyqi ndaj trajnerit të Real Madridit, Carlo Ancelotti, ka përfunduar me kërkesën e prokuorëve për dënimin me 4 vite dhe 9 muaj burg. Trajneri madrilen akuzohet për mashtrim tatimor në më shumë se 1 milion euro. Prokurorët pretendojnë se Ancelotti dështoi të deklaronte të ardhurat nga të drejtat e imazhit gjatë sezonit të tij parë në klubin spanjoll në 2014 dhe 2015.
Prokurorët pretendojnë se Ancelotti ka raportuar vetëm pagën e tij nga Real Madridi, ndërsa ka fshehur të ardhurat nga të drejtat e imazhit në deklaratat e tij tatimore. Ai ka krijuar kompani guaskë për të fshehur fitimet shtesë. Këto kompani dyshohet se kanë fshehur të ardhurat nga të drejtat e imazhit dhe burime të tjera, duke përfshirë pasuritë e paluajtshme.
Dje, Ancelotti në deklaratën e tij para gjyqtarëve tha se ishte Real Madridi ai që propozoi një strukturë pagese në të cilën 15% e shumës do të vinte nga të drejtat e imazhit dhe se ai kurrë nuk mendoi se mund të kishte ndonjë parregullsi apo mashtrim.
“Kurrë nuk e kam menduar të bëj mashtrim. Klubi e sugjeroi, dhe ata kontaktuan me këshilltarin tim, sepse unë nuk isha paguar kurrë në këtë mënyrë”,tha 65-vjeçari në gjykatë gjatë dëshmisë së tij.
Gjyqi ka përfunduar dhe tani pritet dënimi nga Gjykata e Madridit.
