Asllani me valixhe në dorë, do të vendoset pas Botërorit të Klubeve

Kristjan Asllani është një nga lojtarët që në fundin e sezonit mund të përshëndesë Interin. Pavarësisht golit që shënoi dhe dëshirës së tij për të realizuar ëndrrat me fanellën zikaltër, shqiptari do të largohet për t’u sistemuar në një ekip që luan më shumë dhe ndoshta të jetë titullar fiks.

Qëndrimi te zikaltrit nuk po e ndihmon sepse vazhdon të jetë zëvendësuesi i Çalhanoglusë dhe në këtë mënyrë e ka të vështirë që të gjejë ritmin dhe të rritet. Ai e rinovoi kontratën e tij në shtator deri në fundin e sezonit 2028, çka tregon se klubi ka besim te djaloshi kuqezi. Megjithatë vetë Asllani kërkon që të luajë më shumë. Pas Botërorit të klubeve do të ulet për të folur me drejtuesit në mënyrë që të vendosin bashkërisht se cila është më e mira për të dyja palët.

Për djaloshin kuqezi ka shfaqur interes ekipi i Bolonjës dhe mund të përdoret nga klubi si një mundësi për të transferuar në Milano Santiago Kastron ose ndonjë lojtar nga reparti i prapavijës. Për momentin, nuk ka asgjë konkrete. Bashkë me Asllanin do të largohen gjithashtu Arnautoviç dhe Korrea, të cilëve u përfundon kontrata.