Në prezantimin e kandidatëve të koalicionit “PD – Aleanca për Shqipërinë Madhështore” për Qarkun Elbasan, kreu i PD-së, Sali Berisha, premtoi rritjen e pagave të mësuesve dhe digjitalizimin e sistemit arsimor. Berisha tha se në fund të mandatit të parë, paga e mësuesve do të jetë 1500 euro.
“Jua premtoj këtë nga ky qytet, djep i arsimit. Mësuesit nuk do të largohen për mungesë orësh nga sistemi arsimor,” tha Berisha.
Berisha tha se politikat arsimore që do të ndërmerren gjatë mandatit të parë do të synojnë reduktimin e numrit të nxënësve në klasat e mbingarkuara dhe tabelat digjitale do të vendosen në të gjitha shkollat e mesme dhe 9-vjeçare, si pjesë e një procesi të thellë digjitalizimi të sistemit arsimor.
