Florent Hasani u transferua këtë fundjavë në Turqi tek Boluspor dhe direkt pas zyrtarizmit debutoi me klubin e ri.
Ish-i i Tiranës la Rumaninë për klubin e Dean Liços dhe para dy ditësh gjeti minutat e para me bardhekuqtë. Në takimin e ligës së parë turke ndaj Ankara Keciorengucu, sulmuesi u zgjodh nga tekniku turk për t’u aktivizuar.
Shqiptari u hodh në fushë në minutën e 61-të, ku zëvendësoi Yildiz dhe luajti rreth 30 minuta.
Ish-i i Superiores mori notën 6.7, jo keq si sfida e parë në Turqi. Në ndeshjen e parë në aventurën e re, lojtari shqiptar pati si kundërshtar një tjetër ish-të Superiores. Eduart Rroca ishte vendimtar ndaj Hasanit pasi “gatoi” golin e vetëm të kryeqytetasve në barazimin ndaj klubit të Florentit dhe Liços.
27 vjeçari pas debutimit zyrtar ka përveshur mëngët në stërvitje ku duket se do të jetë një ndihmë e madhe për Bolusporin.
