Një lajm i papritur është shpërndarë sot në mediat italiane sa i përket Juventusit dhe nuk ka të bëjë me situatën që po kalon Tiago Mota në pankinën e bardhezinjve. Sipas “Corriere Dello Sport”, Andrea Anjeli, ish-presidenti i bardhezinjve, është gati të blejë klubin duke e marrë nga kompania e familjes Anjeli, “Exor”, e cila ka kuotat kontrolluese.
Gazeta italiane bën të ditur se Andrea Anjeli po synon të kthehet përsëri protagonist në futbollin e rëndësishëm, pas disa viteve larg tij si pasojë e dënimit që iu dha për çështjen e plusvalencave fiktive të klubit bardhezi. Duket e vështirë që ai të ketë personalisht fondet e mjaftueshme për të blerë klubin, i cili vlerësohet mbi 1,3 miliard euro, por nuk përjashtohet mundësia që të ketë mbështetje nga investitorë amerikanë.
Megjithatë, për momentin zëdhënës të kompanisë “Exor” kanë cilësuar gjithçka të pabazuar mbi fakte reale, por pa përgënjeshtruar mundësinë e shitjes së klubit bardhezi te një pjesëtar i familjes, siç është Andrea Anjeli.
