Është eskraduar në Shqipëri Albert Shkëmbi, i dënuar me 12 vite burg nga Gjykata e Krimeve të Rënda, si pjesë e një grupi kriminal të trafikut ndërkombëtar të drogës.
Sipas hetimeve të kryera në vitin 2015, Albert Shkëmbi zhvillon aktivitet fushën e trafikimit të heroinës të cilën e siguron në Turqi, e transporton më pas në Shqipëri nëpërmjet rrugës tokësore dhe e trafikon jashtë Shqipërisë në vendet e Evropës Perëndimore.
Në këtë veprimtari kriminale ai bashkëpunonte dhe shtetasit Marsel Morava, Kleanthi Agolli, Manjola Terolli, të cilët e ndihmonin në gjetjen magazimimin dhe shitjen e lëndës narkotike, si dhe shtetasja Eleni Xhafa në rolin e transportueses.
Njoftimi i Interpol Tirana:
Finalizohet një tjetër operacion i suksesshëm ndërmjet Policisë së Shtetit dhe Zyrës Rajonale të Sigurisë (RSO)/Zyra e Hetimeve kriminale (OCIU) pranë Ambasadës së Shteteve të Bashkuara të Amerikës, në Tiranë.
Në kuadër të operacionit të koduar “Return”, ekstradohet në Shqipëri, shtetasi Albert Shkembi, i dënuar me 12 vjet burgim, për veprimtari kriminale në fushën e narkotikëve.
Në vijim të operacioneve të përbashkëta mes Policisë së Shtetit dhe agjencive ligjzbatuese amerikane, për lokalizimin, kapjen dhe ekstradimin e shtetasve të shpallur në kërkim ndërkombëtar, është finalizuar operacioni policor i koduar “Return”.
Në kuadër të këtij operacioni, është ekstraduar nga Shtetet e Bashkuara të Amerikës në Shqipëri, shtetasi Albert Shkembi, 60 vjeç.
Lokalizimi dhe kapja e këtij shtetasi, në New Jersey, në muajin qershor të këtij viti, është bërë e mundur pas shkëmbimit të vazhdueshëm të informacioneve ndërmjet Policisë së Shtetit, DSS/OCIU pranë Ambasadës së Shteteve të Bashkuara Tiranë dhe Shërbimit të Marshallëve Amerikanë.
Ky shtetas ka qenë i shpallur në kërkim ndërkombëtar, pasi Gjykata e Apelit Tiranë, me vendimin e datës 22.11.2016, e ka dënuar me 12 vjet burgim, për veprën penale “Trafikimi i narkotikëve”, mbetur në tentativë, kryer në bashkëpunim.
Gjatë periudhës 2014-2015, ky shtetas, në rolin e organizatorit dhe financuesit, në bashkëpunim me shtetas të tjerë, ka organizuar trafikimin dhe transportimin e lëndëve narkotike kokainë dhe heroinë, nga Turqia drejt Shqipërisë (me itinerar Turqi-Greqi-Maqedoni-Shqipëri), për t’i shitur këto lëndë në tregun e brendshëm, si dhe për t’i trafikuar më pas drejt vendeve të tjera të BE-së.
