Ish-kryeministri Sali Berisha ka reaguar ashpër për thirrjen e gazetarit Elton Qyno në SPAK, ku prej disa orësh u mor në pyetje nga prokurorët.
Berisha e ka shfrytëzuar këtë mundësi të sulmojë SPAK-un, duke e quajtur si organizatë kriminale e narko-partisë.
Berisha thotë se SPAK po e mban peng Qynon dhe po ushtron ndaj tij terror dhe torturë psikologjike, duke i kërkuar “brutalisht” të tregojë burimet e informacioneve.
Dyshohet se Qyno është thirrur në SPAK lidhur me publikimin e dëshmisë së të penduarit të drejtësisë Nuredin Dumani në media. Në atë kohë SPAK i kërkoi me shkrim gazetarit të ndalonte publikimin pasi rrezikonte prishjen e hetimeve.
Reagimi i Berishës:
Stop terrorit nga Skapi i Partisë ndaj gazetarit të njohur Elton Qyno.
Të dashur miq, në një atentat të vërtetë ndaj lirisë së mediave dhe terrori të pashembullt dhe torture psikoligjike, skapist të papërgjegjshëm të narko-partisë mbajnë që nga ora 10:00 e mëngjesit të ngujuar në zyrat e Skapit gazetarin e mirënjohur të Ora Neës, Elton Qyno. Ata i kërkojnë atij brutalisht të tregojë burimet e informacioneve që i shesin vetë.
Dënoj me forcën më të madhe këtë akt kriminal, pengmarrje të gazetarit Qyno dhe kërkoj lirimin e tij të menjëhershëm si dhe ndëshkimin e rreptë ligjor të autorëve të këtij akti që përbën një atentat të rëndë ndaj lirisë së mediave dhe rrëmbim shtetëror të gazetarit Elton Qyno.
