Sulmuesi adoleshent i Barcelona-s, Lamine Yamal, tha se nuk do ta krahasonte veten me Lionel Messi-n, dhe më pas dha një performancë që një Messi 17-vjeçar mund ta kishte ëndërruar vetëm në njërën nga ndeshjet më të mëdha gjysmëfinale të Champions League-s.
Kjo bëri që ai të quhej “gjeni”, “një kod mashtrues” dhe “një talent fenomenal”.
Barça dhe Inter-i përfunduan duke barazuar 3-3 në përballjen e tyre epike të ndeshjes së parë, me mbrojtësin e krahut mysafir Denzel Dumfries të përfshirë në të tre golat e Inter-it, duke shënuar dy herë dhe duke u shpallur lojtari i ndeshjes.
Por, shumica e titujve kryesorë të lajmeve globale po përqendrohen te 17-vjeçari Yamal, i cili shënoi golin e tij të 22-të në ndeshjen e tij të 100-të historike me Barcelona-n.
Statistika e jashtëzakonshme që u nda gjerësisht pas ndeshjes ishte një krahasim i drejtpërdrejtë me dy lojtarët më të mëdhenj të kësaj gjenerate në të njëjtën moshë – Messi, i cili shënoi një gol në nëntë paraqitje në moshën 17 vjeç dhe Cristiano Ronaldo, i cili shënoi pesë gola në 19 paraqitje para se të mbushte 18 vjeç.
Yamal tregoi klas, veçanërisht në pjesën e parë për të frymëzuar një barazim pasi Inter-i kishte udhëhequr 2-0 në minutën e 21.
Yamal shënoi një gol të shkëlqyer në gjysmëfinalen e Champions League, së bashku me një tjetër në gjysmëfinalen e Euro 2024 verën e kaluar. Tashmë një nga lojtarët më të mirë në botë – dhe para se të mbushë 18 vjeç.
“Nuk mendoj se kam parë 45 minuta të tilla nga një individ më parë në jetën time. Është e pabesueshme”, tha analistja e “TNT Sports”, Ally McCoist, ndërsa lojtarët dolën nga fusha në pushimin e pjesës së parë.
Trajneri i Inter-it, Simone Inzaghi, i dha Yamal-it lëvdatat më të larta më pas.
“Lamine është lloji i talentit që shfaqet çdo 50 vjet, dhe ta shihja nga afër më bëri shumë përshtypje”, tha ai.
“Ai na shkaktoi probleme të mëdha sepse duhej ta dyfishonim markimin për të dhe kjo nuk mjaftoi”.
Trajneri i Barcelona-s, Hansi Flick, tha: “Ai është i veçantë, është gjeni. Në ndeshjet e mëdha, ai shfaqet i fortë”.
“Nëse vjen vetëm çdo 50 vjet siç tha Simone, jam i lumtur që është për Barcelona-n”.
Analisti i “BBC”-së, Stephen Warnock, e quajti atë “një fitues i ardhshëm i Topit të Artë”.
Një nga ndeshjet më të mira të sezonit i ka entuziazmuar të gjithë për takimin e kthimit në “San Siro” të Milanos javën e ardhshme, një ndryshim ritmi nga fitorja e vështirë 1-0 e Paris St-Germain-it ndaj Arsenal-it një ditë më parë.
Çfarë bëri Yamal?
Pati pak dramë para ndeshjes kur Yamal duket se pësoi një dëmtim në ijë dhe zbriti në tunel gjatë ngrohjes, me spekulime se ai mund të mos luante.
Ai e nisi ndeshjen si titullar, por mezi kishte pasur ndikim para se Inter-i të udhëhiqte 2-0 me anë të dy golave fantastikë, një goditje 30-sekondëshe me thembër nga Marcus Thuram-i pas një harkimi të Dumfries-i dhe një gjuajtje akrobatike nga afër e holandezit.
Por më pas Yamal – i cili po markohej dyshe – erdhi në jetë, duke dribluar disa lojtarë të Inter-it përpara se ta dërgonte topin në shtyllën e largët me lehtësi dhe besim të habitshëm.
Pak çaste më vonë, ai mundi më shumë mbrojtës në vijën anësore dhe lëshoi një goditje të cilën portieri i Inter-it, Yann Sommer, e devijoi në traversë.
Ferran Torres më pas përfundoi një lëvizje të shkëlqyer të ekipit për ta barazuar rezultatin para pushimit.
Megjithatë, më pas Dumfries shënoi golin e tij të dytë me kokë për ta rikthyer ekipin italian në epërsi.
Por pak çaste më vonë, Barça barazoi përsëri rezultatin, teksa Yamal me zgjuarsi krijoi një tunel për topin i cili përfundoi te Raphinha, me brazilianin që gjuajti nga distanca. Goditja e tij kapi traversën dhe përfundoi në portë pas një devijimi në kurrizin e Sommer-it.
Henrikh Mkhitaryan mendoi se e kishte bërë rezultatin 4-3 për Inter-in, por goli i tij u anulua për një pozicion jashtë loje gati milimetrik.
Megjithatë, Yamal pothuajse e kishte fjalën e fundit, një moment tjetër të paharrueshëm, kur gjuajtja e tij goditi këndin mes shtyllës dhe traversës.
Rekordet vazhdojnë
Është e vështirë të imagjinohet sa shumë ka arritur Yamal në moshën e tij.
Kjo ishte paraqitja e tij e 100-të me Barcelona-n dhe goli i 22-të, duke shtuar edhe katër gola në 19 ndeshje për Spanjën.
Yamal ka gjithashtu 27 asistime, përfshirë dy në fitoren e së shtunës në kohën shtesë të finales së Kupës së Mbretit ndaj Real Madrid-it.
Messi dhe Ronaldo nuk debutuan me kombëtaren deri në moshën 18 vjeç, ndërsa Yamal fitoi Euro 2024 një ditë pas ditëlindjes së tij të 17-të.
Messi shënoi një gol dhe nuk bëri asnjë asist para moshës 18 vjeç, me Ronaldo-n që shënoi pesë dhe katër asistime.
Yamal është lojtari më i ri i Barcelona-s në La Liga (15 vjeç) dhe më i riu që shënon dhe asiston në La Liga për ndonjë ekip.
Ai gjithashtu mban rekordin për të qenë lojtari më i ri titullar në Champions League, lojtari më i ri që shënon në një ndeshje eliminatore, një çerekfinale dhe tani një gjysmëfinale.
Yamal është lojtari dhe golashënuesi më i ri i Spanjës dhe lojtari dhe golashënuesi më i ri në një Kampionat Evropian.
Yamal nuk mund t’i shmangë krahasimet me Messi-n
Shumë pak lojtarë kanë pasur ndikim në futboll deri në moshën e Yamal-it. Ai do të mbushë 18 vjeç në korrik.
Ai duket të jetë gjëja më e afërt që kemi parë me legjendën e Barcelona-s dhe Argjentinës, Messi-n, i cili tani është pjesë e Inter Miamit dhe padyshim futbollisti më i madh në histori.
Dyshja erdhi nga akademia e Barçës, “La Masia”, dhe të dy luajnë në krahun e djathtë.
“Nuk e krahasoj veten me të, sepse nuk e krahasoj veten me askënd – dhe aq më pak me Messi-n”, u tha Yamal gazetarëve në përgatitje të ndeshjes, ndërsa e përshkroi argjentinasin si “lojtarin më të mirë në histori”.
Por Messi ishte shumë, shumë premtues në moshën 17-vjeçare, në vend që të konsiderohej tashmë si një nga më të mirët në botë.
Yamal shtoi: “Nuk mendoj se krahasimi ka kuptim, me Messi-n edhe më pak – do ta shijoj veten dhe do të jem vetvetja”.
Por ai ka një histori të pazakontë me Messi-n, me të cilin është fotografuar kur ishte foshnjë.
Një foto doli në pah e realizuar në stadiumin “Camp Nou” të Barcelona-s në vitin 2007.
Në të, Messi 20-vjeçar mbante në krahë foshnjën Yamal dhe e ndihmonte të bënte një banjë. Po, me të vërtetë.
Xhirimi ndodhi pasi UNICEF-i organizoi një llotari në qytetin e Mataro-s ku jetonte familja e Lamine-s.
“Ne ecëm drejt qendrës së qytetit dhe mund të kuptoje se tani në këtë qytet ka një yll, Lamine Yamal”, tha ish-mbrojtësi i Anglisë, Rio Ferdinand, për “TNT Sports”.
“Pati një boshllëk kur Messi u largua, ky djalosh në moshën 17 vjeç po bën gjëra që nuk i kemi parë kurrë më parë. Rehatia dhe lehtësia me të cilën luan është e jashtëzakonshme dhe ai është po aq i qetë edhe jashtë fushës”, tregoi anglezi.
“Të gjithë të tjerët të largohen nga rruga”
Ekspertët mbetën të mahnitur nga ajo që panë nga Yamal.
Owen Hargreaves, ish-mesfushori i Bayern Munich-ut, Manchester United-it dhe Anglisë, e quajti atë një “kod mashtrues” në “TNT”.
“Dua vetëm që Lamine Yamal ta marrë topin dhe të gjithë të tjerët të largohen nga rruga”, shtoi ai.
Ish-mbrojtësi i Liverpool-it dhe Anglisë, Warnock, duke ndjekur emisionin e “BBC”-së për ndeshjen e ditës në Champions League, tha: “Goli i tij ishte i jashtëzakonshëm”.
“Ai është thjesht një talent fenomenal dhe më pëlqen ta shikoj”, vazhdoi ai.
Dhe Ferdinand shkroi në rrjetet sociale: “Si një talent i pastër futbolli, po shkoj deri aty sa të them se mendoj se Lamine Yamal është në një nivel tjetër në krahasim me çdo lojtar që luan në pesë ligat më të mira në futbollin botëror. Vërtet e pabesueshme”.
Dhe, ky është vetëm fillimi i shkëlqimit të një talenti 17-vjeçar, Lamine Yamal.
“BBC”
