Greqia i është përgjigjur deklaratave të kancelarit gjerman Olaf Scholz, i cili kërkoi të mos vendoset veto ndaj anëtarësimit të Shqipërisë, për një çështje dypalëshe si ajo e Fredi Belerit.
Mediat greke shkruajnë se zëdhënësi i qeverisë greke Pavlos Marinakis, i është përgjigjur deklaratave të Scholz duke thënë: “Mendoj se nuk anashkalohet respektimi i rregullave të shtetit ligjor. Çështja e Fredi Belerit nuk është një çështje dypalëshe. Është çështje e shtetit ligjor. Kështu e trajtojmë dhe kështu do të vazhdojmë ta trajtojmë”.
Kancelari gjerman Olaf Solz deklaroi të mërkurën se anëtarësimi i Shqipërisë në BE do të jetë një shpërblim për përpjekjet reformuese të viteve të fundit në vend.
“Kur një vend ka kaluar nëpër reforma të gjera, si në rastin e Shqipërisë, kjo duhet të njihet, përndryshe ekziston rreziku i pasojave të gjera në procesin e përgjithshëm të zgjerimit, të cilat ne nuk mund ta lejojmë”, tha Olaf Solz.
Scholz shkoi më tej duke kërkuar që vendet anëtare të Bashkimit Europian të mos kenë të drejtën e vetos ndaj vendeve kandidate, për çdo kapitull negocimi.
“Nuk ka pse çdo vendim, si çelja apo mbyllja e kapitujve të negociatave, të varet nga çdo vend anëtar. Nëse vende, si për shembull Shqipëria, kanë bërë reforma të rëndësishme, kjo duhet të vlerësohet. Përndryshe, rrezikohet të dëmtohet i gjithë procesi i anëtarësimit dhe këtë nuk duhet ta lejojmë”, tha kancelari në mes të duartrokitjeve të shumë deputetëve në sallë. Thirrjet e kancelarit socialdemokrat shkonin në adresë të Greqisë, e ciila ka kërcënuar se nuk do të lejojë çeljen e kapitullit të parë të negociatave me Shqipërinë, pa u zgjidhur çështja Beleri.
