Në Lazarat, fshatin me histori të trazuar përgjatë dy dekadave të kaluara ekziston një kënd arti, një punishte e rrallë ikonash bizantine.
Mjeshtri i ikonave Drini Dife rrëfen me krenari sot rrugëtimin e tij të pazakontë “Punova rreth katër vjet në Janinë në gdhendjen e drurit, është goxha rrugë e gjatë, ka interes në fakt për ikonat e stilit bizantin”.
E ndërsa porositë deri tani vinin nga Greqia së fundmi ai ka vendosur ta kthejë punishten e tij në një vend ku secili mund të jetojë një eksperiencë individuale e të mësojë të gdhendë e të hedhë ngjyra për të realizuar një suvenir të krijuar vetë.
“Në artin bizantin në fakt ofrohen mundësira estetike ndryshe nga piktura me ngjyra vaji apo me akuarel”.
Mjeshtri i ikonave tregon se ka gjithnjë e më shumë njerëz që besojnë tek e ardhmja në vendlindje dhe të tjerë që kanë nevojë të inspirohen nga shembujt e të mbështeten profesionalisht.
Lazaratit i është dashur një kohë e gjatë për t’i thyer tabutë e për të larguar stigmën. Drini do të vazhdojë të jetojë në Lazarat dhe të krijojë.
Vullneti i tij mund të ishte dhe pikënise për restaurimin e qindra ikonave dhe afreskeve brenda kishave mesjetare në të gjithë jugun. A.K./TemA
