Elbasani arriti një fitore të rëndësishme ndaj Laçit me rezultatin minimal 1-0 në ndeshjen e vlefshme për javën e 31-të të Superiores. Në përfundimin e takimit, trajneri i kurbinasve Francesco Moriero doli kë prononcim për mediat.
“Pësuam gol në një goditje këndi, një situatë që e kishim studiuar gjatë gjithë javës. Elbasani thuajse nuk ka bërë asnjë goditje në portë, të rikuperosh një gol është e vështirë. Gabuam shumë gjëra të thjeshta, por është pjesë e futbollit. Kemi rënë shumë herë dhe jemi ringritur, do ta bëjmë edhe këtë herë.
Melo është rritur pak këtë javë, Bullari dhe Traore kanë bërë ndeshjen e tyre. Tek skuadra ime kush nuk vrapon nuk luajnë, djemtë nuk po bënin atë që i kërkova unë. Myrtaj u fut mirë, pastaj u mundova të çoj Melon sepse është më shumë taktik. Duhet t’i jepja më shumë intensitet lojës.
Ne shikojmë ndeshje të Real Madridit dhe Milanit dhe ka gabime. Shumë herë dhe situata në këto minutazhe janë partikularë. Kemi gabuar, ne kërkojmë gjithmonë kërkimin e pasimit. Më pëlqen një ekip që luan futboll, nuk i qortoj djemtë për pjesën e pasimeve. Jam trajner dhe është e thjeshtë të them që duhet të prisnim. Ne jemi një ekip që luajmë me agresivitet dhe me presing. Presioni duhet të jetë gjithmonë për lojtarët, Traore nuk po i bënte ato që i kërkova ndaj e ndryshova.
E kishim përgatitur këtë ndeshje të luanim në hapsirë. Duke qenë se kundërshtari kishte tre mesfushorë vuante në hapsirë, pjesën e dytë e bëmë mirë. Në të parën më pëlqeu agresiviteti i sulmuesve. Çdo ndeshje është e rëndësishme, edhe ne kemi bërë një ecuri të rëndësishme. Kemi qenë dhe pak pa fat në ndeshjet e kaluara, por përpara kemi dhe 5 finale. Do kërkojmë të bëjmë lojën tonë të qetë. Unë besoj te djemtë e mi dhe që do japin maksimumin, në këto 5 ndeshje edhe 100% ndoshta nuk mjafton”, u shpreh Moriero.
