Kryebashkiaku i Himarës, Vangjel Tavo, ka publikuar në rrjete sociale një foto ku shfaqen klienti i një restoranti, Aben Papadhopulli, kamarieri Nidjo dhe pronari Marko.
Tavo shkruan mbi foton e publikuar se kemi të bëjmë me një histori që na përfaqëson me dinjitet pasi bëhet fjalë për portofolin e humbur të dy turistëve amerikanë me një shumë të konsiderueshëm parash dhe dokumente personale.
Klienti Arben Papadhopulli ishte ai që ia dorëzoi kamarierit Nidjo ndërsa ky i fundit kontaktoi dhe ia dorëzoi pronarit të restorantit, Markos.
Pronari i restorantit arriti të kontaktonte me turistët amerikanë dhe ua ktheu portofollin. Vangjel Tavo shprehet se ky veprim i thjeshtë, i mbushur me vlera njerëzore, preku vizitorët të cilët shprehën mirënjohje të pafundme.
Postimi i plotë i Vangjel Tavos:
Një histori që na përfaqëson me dinjitet. Gjatë vizitës në fshatin e bukur të Vunoit, dy udhëtarë amerikanë humbën një portofol me një shumë të konsiderueshme parash dhe dokumente personale.
Portofoli u gjet nga klienti Arben Papadhopulli, i cili e dorëzoi menjëherë te kamarieri Nidjo. Më pas, pronari i restorantit, Marko, bëri çmos për të gjetur kontaktin me personin që e kishte humbur dhe për t’ia kthyer.
Ky veprim i thjeshtë, por i mbushur me vlera njerëzore, preku thellë vizitorët, të cilët ndanë publikisht mirënjohjen e tyre.
Ky është imazhi i Shqipërisë që duam të përcjellim: Një vend ku ndershmëria është vlerë e rrënjosur. Ku mikpritja nuk është rastësi, por pjesë e identitetit.
Falënderime Arbenit, Nidjos dhe Markos për shembullin fisnik.
Krenarë për njerëzit tanë!
