SPANJË – Girona po vazhdon të shqetësojë ‘të mëdhenjtë’ në kampionatin më elitar të Spanjës. Fitorja mahnitëse e së dielës 4-2 ndaj Barcelonës do të thotë se Real Madridi, rivalët e qytetit Atletico, Barca dhe Real Sociedad – të gjithë liderët e grupeve të tyre të Ligës së Kampionëve – vazhdojnë të jenë pas skuadrës nga Katalonja.
Agjencia e lajmeve PA jep disa detaje rreth Los Blanquivermells, të cilët kanë humbur vetëm një herë në 16 ndeshje këtë sezon dhe kryesojnë tabelën me dy pikë diferencë ndaj Real Madrid.
A kanë fituar ata ndonjëherë ndonjë trofe?
Jo nuk kanë fituar, nëse nuk numërojmë titujt e kampionateve më të ulëta dhe kupat rajonale. Kjo është vetëm hera e katërt që Girona merr pjesë në kampionatin më të mirë të Spanjës dhe vetëm dy herë ka përfunduar në Top-10.
Kush është pronari i klubit?
Girona është në pronësi të City Football Group (CFG), i cili zotëron Manchester Cityn. CFG bleu 44.3 për qind të aksioneve në klub në 2017 me Girona Football Group e tani zotëron 47 për qind.
A kanë shpenzuar shumë para?
Një sasi jo e konsiderueshme. Sulmuesi ukrainas Artem Dovbyk, goli i parë i të cilit në fitoren e së dielës ndaj Barçës ishte goli i tij i shtatë në vetëm 10 ndeshje në La Liga, ka kushtuar 7 milionë paund dhe është marrë nga Dnipro.
Kush është menaxheri i tyre?
Miguel Angel Sanchez Munoz, i njohur më mirë si Michel, udhëhoqi Rayo Vallecanon në La Liga në 2018 dhe më pas Huescan. Si lojtar, ai ishte një mesfushor që luajti më shumë se 180 ndeshje në La Liga, shumicën prej tyre me Rayon.
A kanë lojtarë të njohur?
Duke marrë parasysh pronësinë, ka një lidhje me Cytin. Mbrojtësi Eric Garcia dhe mesfushori Aleix Garcia luajtën për Manchester City, ndërsa braziliani Yan Couto – në periudhën e tretë në huazim me Gironan – është mbrojtës i Cityt. Ish-portieri i Tottenham, Paulo Gazzaniga dhe ish-mbrojtësi i Manchester United, Daley Blind luajnë gjithashtu në mënyrë të rregullt në skuadër.
Po kapiteni i tyre, kush është?
Cristhian Stuani, tani 37 vjeç, dikur ka luajtur me Middlesbrough. Ai ia ka dalë që të frymëzojë 11-tëshen e ekipit modest, teksa fitoret kanë bërë që tifozët e këtij ekipi ta besojnë se Girona së paku do jetë në Top 4 në fund të kampionatit. Girona në 16 ndeshje ka grumbulluar 42 pikë, duke kryesuar kampionatin. Më pas vjen Reali dhe Atletico.
