Karlo Ançeloti ka pranuar pas eliminimit të Real Madrid nga Liga e Kampioneve se Arsenali e kishte merituar më shumë kalimin në turin tjetër të turneut.
“Për të ndryshuar dinamikën, na duhej diçka pozitive, si penalltia që u akordua dhe më pas u hoq. Na duhej diçka që të na jepte më shumë besim. Nuk ishim në gjendje të ndryshonim dinamikën e ndeshjes së parë; eliminatorja u vendos në ndeshjen e parë”, tha fillimisht trajneri për “Movistar” pas sfidës.
“Duhet të jemi të sinqertë, në të dyja ndeshjet Arsenali e meritoi dhe arriti në gjysmëfinale. Ka dy fytyra të futbollit: ana e lumtur, që na ka ndodhur shumë herë, dhe ana e trishtuar, duhet ta menaxhojmë në të njëjtën mënyrë. Na ka ndodhur më rrallë se skuadrat e tjera, por duhet ta menaxhojmë sepse na lejon të jemi më të mirë në ndeshjet e ardhshme.
Rikuperimi? Tani po luftojmë për titullin. Jemi në disavantazh, por kemi ndeshjen e Barcelonës, finalen e Kupës së Mbretit dhe Botërorin për Klube. Duhet ta menaxhojmë këtë aspekt, që është një aspekt tjetër i futbollit me të cilin nuk jemi mësuar, por ekziston. Është koha të mbajmë kokën lart dhe më pas të mësojmë nga gabimet tona.
Ndeshja e fundit në Champions me Realin? Këtë sezon, po, për fat të keq. Ne kemi pasur një ecuri fantastike këto vitet e fundit, kështu që le të shohim se çfarë do të ndodhë vitin e ardhshëm. Nuk e di, nuk dua ta di, ka ende kohë”, tha trajneri italian duke lënë gjithçka të hapur.
