Partizani mund të quhet në hall për mesfushorë. Është një repart që duhet populluar sërish dhe kanë kaluar të gjithë afatet para Europës
Ndeshja me Kaljun qëndron më pak se një javë larg, ndërsa të kuqtë nuk ia dolën të përforcojnë mesfushën. Kjo për shkak se zgjedhjet duhet të jenë të menduara mirë dhe pikërisht emrat e duhur. “Panorama Sport” ju sjell një panoramë se çfarë po ndodh aktualisht me merkaton në këtë repart.
MESFUSHORE NGA JASHTË- Partizani po punon që të përforcohet gjatë ndeshjeve të Europës. Bëhet fjalë për lojtarë, që nuk janë të njohur për futbollin shqiptar. Nuk do të jetë vetëm një mesfushor, pasi tashmë nevoja është për më tepër. Janë larguar Taipi, Shala dhe Mintongo nga edicioni i kaluar. Në mungesë të tyre është e domosdoshme nevoja për elementë të rinj.
