“Procesi integrimit, i dobishëm për të gjithë shoqërinë!”- Tabaku takim me ministren Austriake: E nevojshme ndërmarrja e reformave për eliminimin e korrupsionin

Kryetarja e komisionit të Çështjeve Europiane, Jorida Tabaku, ka zhvilluar ditën e sotme një takim me Ministren e BE dhe Kushtetutës së Austrisë, Karoline Edtstadler, e cila është në një tur të Ballkanit Perëndimor.

Mësohet se diskutimi kishte në fokus rrugëtimin e Shqipërisë dhe rajonit në Bashkimit Evropian.

Tabaku u shpreh se Shqipëria ka një rrugë të qartë drejt BE por fatkeqësisht ndodhemi në udhëkryq me hapjen e kapitujve dhe procesin si dhe përthithjen e ndihmës financiare të BE.

Plani i rritjes është një instrument që duhet përthithur dhe nuk e kemi luksin të humbim mundësitë ekonomike për të përafruar Shqipërinë me rajonin dhe vendet e BE.

Ndër të tjera, Tabaku falenderoi ndihmën dhe shtytjen që Austria ka pasur për procesin e integrimit të Shqipërisë, ndërsa theksoi se është e domosdoshme që rajoni i plotë të nisë sa më shpejt procesin e anëtarësimit.

Po ashtu, deputetja e PD theksoi se është e rëndësishme që shqiptarët të jenë përfituesit real të këtij procesi ndërsa theksoi nevojën e ndërmarrjes së reformave të rëndësishme që do të eliminojnë korrupsionin dhe ta parandalojnë atë.