“Nën drejtimin e kryebashkiakut Erion Veliaj, qyteti ka përjetuar një transformim të thellë, i cili e ka bërë atë të shfaqet si një model urban”. Kështu shkruan revista e njohur Forbes e cila i ka kushtuar një hapësirë të veçantë zhvillimit të shpejtë të Tiranës vitet e fundit.
Forbes nënvizon se drejtimi i Veliajt që filloi në vitin 2015, karakterizohet nga një vizion i guximshëm dhe inovativ, që synon përmirësimin e cilësisë së jetës së qytetarëve, promovimin e zhvillimit ekonomik dhe shndërrimin e Tiranës, në një qendër kulturore dhe turistike të klasit të parë.
Artikulli i plotë:
Evolucioni i vazhdueshëm i vizionit gjeopolitik (dhe rrjedhimisht ekonomik) në Evropë na tregon se si përtej Adriatikut, interesi për kapitalin e huaj, kryesisht nga Italia fqinje, është baza e një nisme, për t’u hapur ndaj zhvillimit, i cili tashmë ka nisur prej disa vitesh. Mikpritja, luksi, zgjerimi urban dhe vëmendja ndaj kulturës rezultojnë të jenë katër gurët e themelit të një ndryshimi që synon riformësimin e skenarit të të gjithë hapësirës ballkanike, ku Shqipëria po luan rolin e protagonistes.
Ndër qytetet kryesore është sigurisht kryeqyteti, Tirana, dëshmitar i një hapjeje të shpejtë financiare ndaj kapitalit ndërkombëtar – Italia është objektivi i saj kryesor. Një transformim i shpejtë ‘estetik’, i mbështetur nga një bum i paprecedentë ndërtimi, me ngritjen e ndërtesave dhe zonave financiare që ndryshuan horizontin e saj, rrënjosur si një përzierje e arkitekturës osmane, austro-hungareze dhe italiane.
Tirana, kryeqyteti mesdhetar i kulturës dhe dialogut
Në vitin 2025 do të jetë një nga dy kryeqytetet mesdhetare të kulturës dhe dialogut së bashku me Aleksandrinë në Egjipt. Një mirënjohje e rëndësishme, e dhënë nga 43 vendet anëtare të Unionit për Mesdheun (UpM), e cila vjen pas një vlerësimi të kujdesshëm në aspekte të tilla, si promovimi i dialogut ndërkulturor dhe vlerat e tolerancës dhe respektit. “Në një kohë ndarjesh politike dhe konfliktesh serioze, projekti është dëshmi e fuqisë së kulturës në ndërtimin e urave dhe promovimin e dialogut, gjë që është kaq e nevojshme,” tha Nasser Kamel, sekretari i përgjithshëm i UpM.
Gjatë gjithë vitit, Tirana dhe Aleksandria do të presin një sërë ngjarjesh kulturore dhe arsimore, duke forcuar bashkëpunimin mes vendeve të Mesdheut dhe duke i bërë jehonë identitetit të tyre të përbashkët. Një qendër kulturore e gjallë, sot Tirana u ofron partnerëve të saj ndërkombëtarë formula të ndryshme investimi dhe një mikpritje luksoze e cila renditet e para, në bregdetin ballkanik.
Tirana e kryebashkiakut Erion Veliaj: qëndrueshmëri, turizëm dhe kulturë
Një udhëkryq jo vetëm i historisë, kulturës dhe modernitetit, por edhe i rinisjes dhe zhvillimit për milionerët e rinj ndërkombëtarë. Nën drejtimin e kryebashkiakut Erion Veliaj, qyteti ka përjetuar një transformim të thellë, i cili e ka bërë atë të shfaqet si një model urban , shembull edhe në aspektin e qëndrueshmërisë, me rëndësi në rritje si në nivel kombëtar dhe ndërkombëtar. Udhëheqja e Veliajt, e cila filloi në vitin 2015, karakterizohet nga një vizion i guximshëm dhe inovativ, që synon përmirësimin e cilësisë së jetës së qytetarëve, promovimin e zhvillimit ekonomik dhe shndërrimin e Tiranës, në një qendër kulturore dhe turistike të klasit të parë, falë edhe angazhimit të saj të mëparshëm në vijën e parë, me disa organizata humanitare në Kosovë, Amerikën Latine dhe Afrikë. Një përvojë e cila shërbeu për ndërgjegjësimin e mëtejshëm në çështjet e problematikave sociale dhe politike.
Ndër projektet më ambicioze që vlen të përmenden janë pa dyshim, Pylli Orbital dhe Piramida e re, me pamje nga kryeqyteti. E para është një nismë që përfshin mbjelljen e dy milionë pemëve rreth qytetit deri në vitin 2030, një brez i gjelbër që synon të përmirësojë cilësinë e ajrit, të sigurojë hapësira të reja rekreative dhe të kontribuojë në biodiversitetin urban. Por edhe rinovimi i sheshit “Skënderbej”, i shndërruar në një pedonale të rrethuar nga hapësira të harlisura dhe shatërvane, sot një pikë referimi dhe vend tubimi shoqëror për komunitetin, si dhe pikëmbështetje e ngjarjeve kulturore dhe demonstratave publike.
2025? Një mundësi e madhe për Shqipërinë
Sfida e 2025-ës është një mundësi e shkëlqyer për Tiranën, e bazuar në themele të forta të rilindjes dhe dëshirës për t’u pozicionuar në një udhëkryq jashtëzakonisht strategjik mes Ankarasë dhe kontinentit të vjetër. Mund të kuptohet më mirë, nëse krahasohet me zhvillimin urban të kryeqyteteve të tjera fqinje, të cilat kanë ndërmarrë gjithashtu projekte rizhvillimi dhe përmirësimi të infrastrukturës, por gjithmonë duke vënë në vend të parë angazhimin për qëndrueshmërinë mjedisore, promovimin e politikave gjithëpërfshirëse, përveç zhvillimit më aspektin ekonomik.
