Trafiku i drogës nga vendet e Amerikës Latine drejt Europës mbetet një prej shqetësimeve më serioze për Italinë, që në shumë raste shërben si një pikë kalimi. Në orët e fundit në Napoli është ndërmarrë një bastisje masive kundër trafikut të drogës, që ka çuar në pranga 24 persona. Policia italiane njofton se ka shkatërruar dy banda të krimit të organizuar, të cilat kanë pasur në dispozicion armë zjarri dhe automjete të pajisura me një “sistem fshehjeje” të sofistikuar për trafikimin e drogës.
Më tej, gjatë këtyre hetimeve u sekuestruan afërsisht 100 kilogramë të lëndëve narkotike të llojeve të ndryshme, armë zjarri, disa makina të pajisura me “sistem fshehjeje”, një mjet shpërthyes dhe qindra municione të kalibrave të ndryshëm.
Kokaina në Evropë edhe nëpërmjet nëndetëses, “nënujore nga Panamaja”
Përgjimi i një prej të arrestuarve në sulmin kundër trafikut ndërkombëtar të drogës zbuloi se kokaina hyn në Evropë jo vetëm përmes kontejnerëve të mallrave, por edhe përmes nëndetëseve. Në fakt, i arrestuari, me origjinë shqiptare, ka folur me një bashkatdhetar që sapo kishte zbritur në Napoli në një bisedë që daton në qershor 2021.
Dy bashkëbiseduesit diskutojnë për mënyrat e transportit të drogës dhe rreziqet ndaj të cilave ato ekspozohen, për shembull, kur ajo transferohet në një qese, për shkak të qenve nuhatës të drogës. Ata pretendojnë se kontejnerët ofrojnë siguri më të madhe, por vetëm “nën ujë është 100% e sigurt, por përshtatet vetëm nga Panamaja”, thonë ata.
Fraza interpretohet nga hetuesit si një demonstrim se mjeteve tradicionale tani po u shtohet dhe nëndetëset si një mundësi për trafikimin e drogërave. Një rast i ngjashëm është zbuluar nga ushtria amerikane, ndërkohë që Panamaja nga ana tjetër, konsiderohet si një nga kryeqytetet botërore të kokainës.
