Pas më shumëse 20 vitesh emigrimi në Greqi, katër vëllezërit Gega, vendosën të kthehen në fshatin e lindjes, në Kurjan të Roskovecit, ku investuan në bujqësi duke mbjellë lajthi dhe shegë.
Shtatë vite pasi ndërmorën këtë investim, ata duken të zhgënjyer. Edhe pse tregun e kanë patur të siguruar, mungesa e kushteve minimale për këtë lloj aktiviteti, siç janë rruga apo energjia elektrike ka bërë që prodhimi të bjerë dhe të mos justifikojë mundin dhe angazhimin e tyre.
“Kemi qenë emigrantë në Greqi, kemi punuar andej. Vendosëm të kthehemi dhe mbollëm bajame e shegë, por jemi mërzitur. Rruga është kryesorja. Për rrugën kemi dëmtuar gjysmën e prodhimit”, shprehet njëri prej vëllezërve.
Të ndodhur në të tilla kushte dhe tashmë pa shpresë që gjërat mund të ndryshojnë ata janë pesimistë për të ardhmen duke llogaritur edhe braktisjen e këtij aktivitetin.
Ky është shembulli kur mungesa e mbështetjes së shtetit, detyron largimin për të dytën herë të njerëzve që janë përpjekur me të gjithë mundësitë të mos braktisin vendin e tyre.
