Vatikani zbulon shkakun e vdekjes së Papa Françeskut

Papa Françesku vdiq nga një goditje cerebrale dhe si pasojë e dështimit të zemrës, ka njoftuar Vatikani.

Goditja cerebrale çoi në koma dhe dështim të pakthyeshëm të zemrës, thuhet në certifikatën e vdekjes, e publikuar nga Vatikani.

Raporti vjen rreth 12 orë pasi u njoftua vdekja e Papës, i cili vuante nga një sëmundje kronike e mushkërive.

Problemet  shëndetësore e munduan atë gjatë viteve të fundit të jetës së tij dhe ai u shtrua në spitalin Gemelli më 14 shkurt për një krizë të frymëmarrjes që çoi në pneumoni të dyfishtë.

Kjo çoi në një qëndrim 38-ditor në spital. Megjithatë, ai doli në publik të dielën e Pashkëve, një ditë para vdekjes së tij, për të bekuar mijëra njerëz në Sheshin e Shën Pjetrit.