Ndeshja me Shqipërinë vazhdon të shkaktojë polemika në Beograd. Në një prononcim për mediat para ndeshjes me Andorrën, trajneri i Serbisë, Dragan Stojkoviç Pixi, komentoi sërish atmosferën në stadiumin “Air Albania”. Reagimi i tij vjen pasi u kritikua nga mediat për shkak se Stojkoviç Pixi e kishte “vlerësuar si të mirë” të gjithë mbarëvajtjen e ndeshjes.
“Le të sqarojmë disa gjëra. Nuk e kam ndjekur median, kjo është tashmë dita e katërt. As nuk e di kush po shkruan, as kush po raporton çfarë. Unë përqendrohem në atë që është puna ime, t’i bëj djemtë gati. Thashë mendimin tim për mjedisin e futbollit, ekskluzivisht për futbollin. Unë flas fjalor futbolli dhe përdor terminologjinë e futbollit. Ajo që pashë në fushë ishte vetëm për respekt. Sigurisht që gjithmonë do t’i dënoj gjërat jo-futbollistike. Ka institucione që merren me ato gjëra. Ata do ta marrin dënimin, por ne nuk do t’i ndëshkojmë. Ju nuk ishit atje, ju e patët në TV. Të gjithëve do t’u pëlqente një atmosferë e tillë,“-tha trajneri serb.
Por evidentoi edhe anët negative, gjithmonë sipas tij.
“Për herë të parë ndodhi që nuk e dëgjova himnin kombëtar. Imagjinoni atë shpërthim indinjate dhe fishkëllimash. Nga ana tjetër, ne kënduam himnin tonë kombëtar me krenari. Ky ishte një motiv shtesë për ne, që të mos i nënshtroheshim atij presioni. Kjo është një fitore e madhe. A mendoni vërtet se do të na prisnin me duartrokitje? Sjellja e tyre është sjellja e tyre. Unë nuk jam politikan, nuk e përdor atë fjalor. Jam jashtëzakonisht i kujdesshëm për atë që them. Komentova atmosferën në stadium. E dua Serbinë time dhe dua t’i bëj kampionë. Ky është misioni im. Mikpritje fenomenale, organizim fenomenal. Asnjë problem i vetëm,”- theksoi Stojkoviç.
Ndeshja me Serbinë u luajt në Tiranë, 3 ditë më parë, ku të dyja skuadrat u “mjaftuan” me një barazim pa gola.
