Fushata zgjedhore nuk ka nisur ende zyrtarisht por të gjithë janë në “fushëbetejë”! Por në kushtet kur një votë më shumë të siguron thyrjen e herësit dhe futej në Kuvendin e Shqipërisë, duket se gara mes kandidatëve për deputetë është shtuar. Ndaj për të shmangur përplasjen mes socialistëve, ka pasur një ndërhyrje nga kryeministri Edi Rama. “A2 CNN” ka mësuar se Rama u ka dërguar porosi të gjithë kandidatëve.
Në kërkesën e tij, numri një i socialistëve u ka bërë të qartë që të fokusohen në fushatë vetëm në zonën që u është caktuar. Po ashtu u është kërkuar që të përdorin strukturat e Partisë Socialiste të një zone tjetër për të mbledhur vota personale. Për Ramën, Partia duhet të jetë më e rëndësishme se vota e tyre personale.
“Asnjë deputet s’duhet të hapë zyra të veta jashtë zonës së caktuar nga drejtuesi politik. Deputeti është i lirë të bëjë takime ku të dojë, por në asnjë mënyrë nuk duhet të përdorë për takimet e tij strukturën. Struktura është në funksion të qëllimit të përbashkët, jo për t’u bërë tabelë qitje e çdo deputeti. Deputetët në listë të mbyllur nuk duhet kategorikisht të kërkojnë vota për asnjë deputet në listën e hapur, po vetëm për numrin 5. Të gjithëve duhet t‘u thonë tek vota preferenciale jeni të lirë! Po ashtu deputetët në listën e hapur nuk është mirë t’u kërkojnë kolegëve në listën e mbyllur vota në zonën përkatëse, pasi e para i vënë në pozitë të vështirë, e dyta i shtyjnë drejt prishjes së barazisë së garës dhe e treta i bëjnë të çorodisin strukturën,”-mësohet se ka bërë me dije Rama.
