Klisman Cake do të vazhdojë të jetë pjesë e Shkëndijës së Tetovës. Palët kanë rinovuar ditën e sotme kontratën mes tyre edhe për një sezon tjetër.
Me hedhjen e firmës në kontratë, Cake u jep fund zërave për një largim nga kuqezinjtë, me të cilët në këtë sezon arriti të fitojë edhe titullin kampion. Lideri i mbrojtjes është një pikë kyçe në formacionin e kampionëve dhe do të vazhdojë të jetë i tillë të paktën edhe sezonin e ri.
“Vite më parë erdha këtu me një qëllim, të shpallesha kampion. Dhe e arritëm! Kishte sfida, por kurrë nuk mungoi besimi. Kjo fanellë, ky qytet, janë më shumë se një stacion karriere. Kam oferta shumë të favorshme, të cilat shumë lojtarë do t’i ëndërronin, por kësaj here zgjidhjen e bëri zemra. Vendosa të vazhdoj, sepse kemi një mision për të arritur”, shprehet Cake pasi zyrtarizoi vazhdimin e bashkëpunimit me kuqezinjtë.
