Ministria e Brendshme ka publikuar tenderin për menaxhimin e tre ambienteve të pritjes së emigrantëve që do të hapen në Shqipëri, pas marrëveshjes së nënshkruar mes qeverisë italiane dhe asaj shqiptare në fillim të nëntorit. Aktualisht është hapur një procedurë negocimi, pra një tender për të cilin pret oferta deri më 28 mars. Sipas mediave italiane, afatet janë padyshim të ngushta për shkak të datës së hapjes: gjithçka duhet të jetë gati deri më 20 maj.
Të tre strukturat do të mund të strehojnë pak më shumë se një mijë persona në të njëjtën kohë dhe mes tyre nuk mund të ketë të mitur, gra shtatzëna dhe persona të tjerë që konsiderohen të pambrojtur. Një nga tre strukturat do të ndërtohet pranë portit të Shëngjinit, rreth 70 kilometra në veri të Tiranës, dy të tjerat do të jenë në Gjadër. Një qendër do t’i kushtohet konstatimit të parakushteve për njohjen e mbrojtjes ndërkombëtare dhe do të jetë në gjendje të akomodojë maksimumi 880 persona, ndërsa struktura e dytë është në fakt një qendër paraburgimi për riatdhesim (CPR) me një kapacitet maksimal prej 144 personash.
Në synimet e qeverisë italiane, në Shqipëri duhet të përfundojnë njerëzit e shpëtuar nga autoritetet italiane në det, pra, jo njerëzit e shpëtuar nga OJQ-të.
Vlera e kontratës është pak më pak se 34 milionë euro. Në Gjadër do të ketë tre dhoma për vizita ambulatore, dy dhoma me tre shtretër, një sallë operacioni, një laborator analizash, një dhomë me instrumente për radiografi dhe ekografi, një dhomë për vizita psikologjike dhe psikiatrike. Një ekip mjekësh duhet të punojnë brenda kësaj strukture 24 orë në ditë: një mjek i specializuar në anestezi dhe reanimacion, një mjek i specializuar në kirurgjinë e përgjithshme, një mjek i specializuar në ortopedi me aftësi kirurgjikale, një personel mjekësor i specializuar në psikiatri, një infermiere, punonjëse shëndetësore, një teknik laboratori, një teknik radiologjie, një punonjës shëndetësor i specializuar në radiologji, etj.
Në njoftim ka edhe detaje lidhur me kushtet që duhet të ketë një emigrant. Do t’u ofrohen pantallona, një këmishë, një bluzë, pizhame, tre pantallona të shkurtra dhe tre palë çorape. Për garderobën do ketë ndryshim mes verës dhe dimrit. Të ftuarit do të kenë një rrotull letre higjienike çdo javë, një furçë dhëmbësh në muaj, një pastë dhëmbësh 100 ml në muaj, një shishe shampo dhe një shishe sapun të lëngshëm në javë dhe një krehër.
Gjatë periudhës së qëndrimit në Shqipëri, emigrantët nuk do të mund të dalin nga qendrat: nëse e bëjnë, do të kthehen sërish brenda nga autoritetet shqiptare. Tashmë në nënshkrimin e marrëveshjes mes qeverisë italiane dhe asaj shqiptare, kishin dalë në pah shumë probleme lidhur me respektimin e ligjit ndërkombëtar dhe europian në menaxhimin e emigrantëve. Por nëntorin e kaluar, Komisionerja Evropiane për Punët e Brendshme, Ylva Johansson, tha se marrëveshja nuk shkel ligjin e Bashkimit Evropian.
