Klubet e Premier Ligës në Angli do të kryejnë një votim në mbledhjen e tyre të përgjithshme vjetore muajin e ardhshëm mbi një propozim për të hequr sistemin e “video assistant referee” (VAR) nga fillimi i sezonit të ardhshëm. Do të duhen 2/3 e votave ose 14/20 që propozimi të kalojë.
VAR është përdorur në ligën angleze që nga viti 2019, duke ndihmuar në përmirësimin e vendimmarrjes, por edhe duke prodhuar polemika të vazhdueshme. Sezoni 2023-24 ka pasur shumë incidente të diskutueshme, të cilat kanë rritur kritikat ndaj VAR-it dhe kanë bërë që disa ekipe dhe tifozë të vënë në dyshim integritetin e garës.
Një rezolutë është dorëzuar zyrtarisht në Premier Ligë nga Uolvesi që bën thirrje që VAR-i të hiqet këtë verë dhe kjo do të sjellë një votim kur përfaqësuesit e 20 klubeve të mblidhen për mbledhjen e tyre vjetore në Harrogejt më 6 qershor. Në deklaratën e klubit thuhej se lëvizja erdhi pas shqyrtimit të kujdesshëm dhe me respektin më të madh për Premier Ligën, trupën e arbitrave dhe konkurrentët në garë.
“Nuk ka asnjë faj për t’u hedhur, ne të gjithë po kërkojmë vetëm rezultatin më të mirë të mundshëm për futbollin dhe të gjithë palët e interesuara kanë punuar shumë për të bërë një sukses futjen e teknologjisë shtesë. Megjithatë, pas pesë sezonesh VAR në Premier Ligë, është koha për një debat konstruktiv dhe kritik për të ardhmen e saj. Qëndrimi ynë është se çmimi që po paguajmë për një rritje të vogël të saktësisë është në kundërshtim me frymën e lojës sonë dhe si rezultat ne duhet ta heqim atë nga sezoni 2024-25 e tutje”, lexohej në komunikatën e Uolvesit.
