Vëmendja e të gjithë botës është kthyer nga Roma jo vetëm për ceremoninë mortore të Papa Françeskur por edhe për Zgjedhjen e Kreut të Ri të Kishës Katolike.
Për momentin, Kardinali Pietro Parolin, Sekretari i Shtetit i Vatikanit, është kandidati më i fortë për të pasuar Bergoglio për shkak të aftësive të tij diplomatike në marrëdhëniet ndërkombëtare. Në një botë që karakterizohet gjithnjë e më shumë nga prania e krerëve ‘perandorë’ të shteteve, si Trump, Putin dhe Xi Jinping, aftësia për të dialoguar dhe për të marrë një pozicion pa ndërprerje të marrëdhënieve do të jetë ndoshta kriteri kryesor për dallim.
Kardinali Matteo Zuppi, Kryepeshkop i Bolonjës dhe President i CEI, ka gjithashtu kredencialet për të marrë postin, pasi ka kryer një mision paqeje në emër të Bergoglio me shpresën për t’i dhënë fund pushtimit rus të Ukrainës.
Një hap më poshtë është kardinali Luis Antonio Gokim Tagle, pro-prefekt i dikasterit për ungjillëzimin, i cili u krijua kardinal nga Papa Benedikti XVI dhe gjithashtu është vlerësuar shumë nga Papa Françesku.
Më pas vjen prefekti i dikasterit për kulturën dhe ungjillëzimin, José Tolentino de Mendoça, mendimi teologjik i të cilit i bazuar në liri ka hapur gjithashtu një dialog me botët e krishtera jokatolike dhe me ato jo të krishtera.
Zonat jo progresive, megjithatë, mund të kthehen drejt kongolezit Fridolin Ambongo Besungu, kryepeshkop metropolitan i Kinshasës (kryeqyteti i Kongos), ose drejt kryepeshkopit të Marsejës, algjerianit Jean-Marc Noël Aveline.
Dy emra të tjerë të mundshëm mund të jenë patriarku i Jeruzalemit, kardinali Pierbattista Pizzaballa, i cili ka spikatur në Lindjen e Mesme për ekuilibrin e tij dhe Jean-Claude Hollerich i Luksemburgut për hapjen e tij ndaj çështjeve sociale.
Peter Turkson gjithashtu është një figurë e njohur në qarqet e drejtësisë sociale të Kishës Katolike Romake. Si ish-kreu i Dikasterit për Promovimin e Zhvillimit Integral Njerëzor, Turkson ka qenë i zëshëm për çështje të tilla si ndryshimi i klimës, varfëria dhe drejtësia ekonomike.
Peter Erdo ka po ashtu shanse. Si një interpretues i respektuar i së drejtës kanonike, Erdo është një mbrojtës i fortë i mësimeve dhe doktrinës tradicionale katolike. Ai ishte kreu i Këshillit të Konferencave të Peshkopëve Evropianë dhe theksoi ortodoksinë teologjike.
Papa Françesku ka ndërruar jetë sot në moshën 88-vjeçare. Kushtetuta e Vatikanit parashikon një funeral 9-ditor dhe një periudhë prej 15 deri në 20 ditë për të organizuar konklavën, gjatë së cilës elektorët kardinalë, gati 80% e të cilëve zgjidhen nga vetë Françesku, do të kenë detyrën e vështirë për të zgjedhur pasardhësin e tij. Françesku zbuloi në fund të vitit 2023 se dëshironte të varrosej në bazilikën e Santa Maria Maggiore në qendër të Romës, në vend që të varrosej në kriptin e Bazilikës së Shën Pjetrit.
