Sot iu dha lamtumira e fundit Ilaria Sulës, 22-vjeçares shqiptare, e cila u vra nga ish i dashuri i saj, Mark Samson disa javë më parë. Mediat italiane kanë transmetuar të plotë të gjithë ceremoninë e përcjelljes së Ilarias për në banesën e saj të fundit. Një kortezh i gjatë iu drejtua varrezave, ndërsa njerëzit mbanin në duar balona, pankarta, madje ndezën edhe flakadanë të bardhë. Në pankarta shkruanin: “Pusho në paqe engjëll”, “Nëse nesër është radha ime, dua të jem e fundit”, “Koha kalon por buzëqeshja jote është ngulitur në shpirtin tim, Ilaria më mungon çdo ditë”.
Në ceremoni, përveç qytetarëve dhe familjarëve, kishin shkuar edhe kryetari i bashkisë së Ternit, Stefano Bandecchi, deputetë dhe rektori i Universitetit “La Sapienza” të Romës. Për nder të saj, biznese të shumta në zonën e Ternit ulën qepenat dhe iu bashkuan gjithashtu kortezhit.
E ëma, pësoi një gjendje të fikëti në momentin që arriti arkivoli i bardhë i vajzës së saj, i mbuluar me trëndafila të bardhë e të kuq.
“Të pret Bruno tek shtëpia se ti i the do vij në shtëpi. O Iliaria ime, vdeksha mami për ty o Ilaria. O Ilaria ime, ku je ti o shpirti i mamit ku je. O zemra e mamit, hajde këtu te mami. O Ilaria hapi sytë,”- dëgjohet teksa thërret ajo mes lotësh.
Pas fjalëve të nënës së Ilarisë, drejtuar vajzës së saj të vogël të shkëputur nga kjo jetë, rreth dy mijë personat u nisën me kortezh drejt varrezave komunale. Një heshtje shurdhuese e shoqëroi Ilarinë në udhëtimin e saj të fundit mes trëndafilave të bardhë dhe lotëve. Në varreza, përgjatë rrugës kryesore, arkivoli u mirëprit nga shumë tullumbace të bardha dhe më pas u lexua një lutje nga disa anëtarë të bashkësisë islame.
Në shenjë zie, flamujt në ndërtesat komunale janë ulur në gjysmështizë me urdhër të kryebashkiakut të Ternit, ndërsa në Universitetin La Sapienza në Romë, ku Ilaria studionte shkenca statistikore, mësimi u pezullua në nderim të saj. Babai i Ilaries ka falënderuar qytetin, institucionet dhe të gjithë ata që kanë treguar solidaritet me familjen në këtë tragjedi.
Ndërkohë hetimet vazhdojnë! Hetimet për vrasjen e Ilarias kanë përfshirë edhe nënën e filipinasit. Nëna e 23-vjeçarit të akuzuar për vrasjen e studentes shqiptare Ilaria Sulës, sot do të dalë para gjyqit pasi dyshohet për fshehje të trupit të viktimës. Djali, autori i vrasjes gjatë rrëfimit të tij ka deklaruar se “gjithçka e ka bërë vetë”, por hetuesit kanë dyshime për “ndihmën” e ofruar nga e ëma e tij. Mbrojtja e 23-vjeçarit të arrestuar për vrasje të rëndë dhe fshehje kufome po kërkon vlerësimin psikiatrik. Nëna e Samsonit, Nosr Manlapaz pasi ka dëgjuar britmat e 22-vjeçares në dhomën e gjumit, ka hyrë brenda dhe e ka parë të vdekur. Ajo më pas dyshohet se kandihmuar djalin e saj të pastronte skenën e krimit që ndodhi në apartamentin në via Homs, në lagjen afrikane.
Roli i prindërve
Hetuesit po hetojnë rolin e të dy prindërve në këtë vrasje. Fillimisht ata të dy konfirmuan se nuk ishin larguar kurrë nga shtëpia natën e 25 marsit. Babai më pas ndryshoi historinë e tij, duke pretenduar se ai ishte jashtë deri të nesërmen. Hapësira boshe të cilat mbeten edhe në rrëfimin e djalit, i cili ka deklaruar se e ka vrarë shqiptaren pasi ka zbuluar disa mesazhe në Tinder që viktima ka marrë nga një djalë tjetër.
Si veproi autori?
Mark Samson e vrau Ilaria Sulën duke e goditur 3 herë me thikë në fyt, mbrëmjen e 25 marsit, plagë që i shkaktuan vdekjen 22-vjeçares shqiptare në më pak se një minutë për shkak të humbjes së madhe të gjakut. 23-vjeçari mbylli derën e dhomës së tij të gjumit dhe deri pasditen e 26 Marsit e mbajti të fshehur trupin e studentes shqiptare, të cilën e kishte ftuar për të fjetur në shtëpinë e tij, edhe pse kishin një vit që ishin ndarë.
Ndërkohë siç raportojnë mediat italiane, pak ditë pasi i riu ka vrarë Ilarian dhe e hodhi atë në një greminë, ka çuar mjetin e tij në një servis, si dhe ka kërkuar pastrim të makinës. Punonjës të servisit ku Mark Samson çonte mjetin e tij për riparim, e kanë përshkruar atë si një djalë të sjellshëm dhe se nuk kishin menduar kurrë që ai mund të bënte diçka të tillë.
Prej një jave e zhdukur, 22-vjeçarja Ilaria Sula u gjet e vrarë. Trupi i pajetë u gjet në një valixhe të hedhur në humnerë në një zonë të pyllëzuar në Poli. Shqiptarja u vra nga ish-i dashuri i saj filipinas, Mark Samson, i cili ndodhet në qeli. Hetuesit arritën të zbulonin se në ditët pas zhdukjes së vajzës, 23-vjeçari filipinas kishte vazhduar të përdorte telefonin e saj dhe bënte postime nga profilet e Ilarias në mediat sociale për të fshirë dyshimet.
