Mungesa e punonjësve në vend ka bërë që qeveria të shikojë opsione të tjera. Qeveria ka vendosur të lehtësojë procedurat për lejimin e e punonjësve të huaj që të vijnë e të plotësojnë tregun e punës në Shqipëri. Nga lehtësirat do përfitojnë sidomos shtetas nga vendet e treta që nuk kanë të drejtën e lëvizjes në vendet e BE-së.
Me ndryshimet e propozuara në ligjin “Për të huajt” të miratuar në vitin 2021, i jepet e drejta ministrisë së Ekonomisë të lidhë marrëveshje me shtete të tjera për të marrë punonjës në varësi të kërkesave të tregut, shkruan Shqiptarja. Tashmë kanë filluar negociatat me Filipinet për të marrë rreth 40 mijë punonjë nga ky vend të cilët janë të kualifikuar për sektorin e turizmit dhe industrisë përpunuese, si dhe ka nisur negociatat me Indonezinë.
Në projektligjin, e kaluar ishin lehtësuar procedurat e aplikimin për të huajt që duan të punësohen në vend. Në ligjin aktual ishte caktuar që aplikimi bëhej pranë përfaqësive diplomatike, ndërsa tani u jepet mundësia të aplikojnë nëpërmjet sistemit elektronik të vizave, jo më vonë se 90 ditë përpara datës së planifikuar për të ardhur në Republikën e Shqipërisë.
Në ndryshimet ligjore të propozuara është hequr edhe kushti që kishin të huajit për të depozituar një shumë parash në llogarinë bankare si garanci financiare. Tashmë për të aplikuar për vizë mjafton te vërtetosh që ka të ardhura të mjaftueshme financiare për të përballuar jetesën nëpërmjet një dokumenti bankar.
Në projektligj thuhet se lejet do të bazohen në nevojat e tregut, dhe vetëm pasi punëdhënësi në Shqipëri ka tentuar të punësojë fillimisht të papunët në vend, të huaj që janë anëtar të familjeve shqiptare, shtetas nga SHBA, nga shtete të BE, apo nga vendet fqinje të Bosnjë-Hercegovinës, Malit të Zi, Kosovës, Serbisë dhe Maqedonisë së Veriut.
Në Shqipëri punojnë tani për tani më shumë se 9 mijë të huaj, kryesisht në turizëm, ndërtim dhe tregtinë me shumicë. Shifrat zyrtare tregojnë se interesi më i lartë për të punuar në Shqipëri është i shtetasve nga Turqia, Bangladeshi, India dhe Nepali.
