BUDAPEST- Shtetet e Bashkuara të Amerikës kanë hequr sanksionet një ndihmësi të ngushtë të kryeministrit hungarez, Viktor Orbán; Antal Rogán. Lajmin e bëri me dije vetë Departamenti i Shtetit, duke shtuar se masat ndëshkuese të vendosura ndaj Antal Rogán nuk ishin në përputhje me interesat e politikës së jashtme të SHBA-ve.
“Marco Rubio, sekretari i Shtetit, foli të martën me homologun e tij hungarez, ministrin e Jashtëm Péter Szijjártó, dhe e informoi atë për heqjen e sanksioneve. Sekretari informoi ministrin e Jashtëm Szijjarto për heqjen e zyrtarit të lartë hungarez Antal Rogán nga lista SDN, duke vënë në dukje se përcaktimi i vazhdueshëm nuk ishte në përputhje me interesat e politikës së jashtme të SHBA-së,”- tha në një deklaratë zëdhënësja e Departamentit të Shtetit Tammy Bruce.
Sipas “The Guardian“, Orbán dhe partia e tij Fidesz kanë qenë ndër mbështetësit më të zëshëm të Donald Trump në Evropë. Administrata e Joe Biden vendosi sanksione ndaj Rogán më 7 janar për korrupsion, një lëvizje që Budapesti u zotua ta sfidonte pasi Trump të kthehej në Shtëpinë e Bardhë më 20 janar. Rogán është një ndihmës i ngushtë i Orbanit dhe ka drejtuar zyrën e tij të kabinetit që nga viti 2015.
“Gjatë gjithë mandatit të tij si zyrtar qeveritar, Rogán ka orkestruar ngritjen e sistemit aktual të Hungarisë për shpërndarjen e kontratave dhe burimeve publike për miqtë besnikë ndaj tij dhe partisë politike “Fidesz”,”-bëri me dije asokohe departamenti i thesarit i SHBA-së.
Akuzat për korrupsion e kanë ndjekur Orbanin që kur ai erdhi në pushtet në vitin 2010, ndërsa marrëdhëniet e Budapestit me Uashingtonin u tensionuan gjithnjë e më shumë gjatë presidencës së Biden, pjesërisht për shkak të lidhjeve të Budapestit me Moskën, pavarësisht luftës në Ukrainë. Nga ana e tij, Orbán ka mohuar vazhdimisht akuzat për korrupsion. Rogán ka qenë pranë Orbanit për dekada, duke drejtuar makinerinë mediatike të qeverisë së tij dhe duke ndihmuar në orkestrimin e fushatave të tij zgjedhore.
*Lista e shtetasve të bllokuar posaçërisht, e njohur gjithashtu si Lista SDN, është një masë sanksionesh/embargo e qeverisë së Shteteve të Bashkuara që synon terroristët, zyrtarët dhe përfituesit e disa regjimeve autoritare por edhe kriminelët ndërkombëtarë (p.sh. trafikantët e drogës). Kur individët shtohen në listën e shtetasve të caktuar posaçërisht (SDN), asetet e tyre në SHBA bllokohen. Po ashtu, emrat e tyre i shtohen sistemeve të automatizuara të kontrollit të përdorura nga bankat në Shtetet e Bashkuara dhe shumë vende të huaja, duke e bërë të vështirë për ta hapjen ose mbajtjen e llogarive, transferimin e parave ose transaksionet e pronave.
