Firma “Kontakt” e Fatmir Bektashit duket se nuk ka marrë asnjë leje për të ndërtuar nga Këshilli Kombëtar i Territorit për projektin “Pyjet e Drilonit”. Në një përgjigje për “Report Tv”, Agjencia e Zhvillimit të Territorit konfirmon se Fatmir Bektashi nuk e ka një leje ndërtimi dhe as zhvillimi në Pogradec. Po sipas AZHT, aplikimi mund të refuzohet nëse kompania nuk plotëson kushtet e përcaktuara nga neni 15 i VKM-së për “dhënien e lejes së ndërtimit”.
“Në sistemin elektronik e-leje është depozituar aplikimi për Leje Ndërtimi me Nr. 1282 Protokolli, datë 08.02.2025 për objektin: “Pyjet e Drilonit, kompleks me godina banimi 1-9 dhe 12 kate mbitokë dhe 1 kat nëntokë, me zhvillues shoqërinë “KONTAKT” SHPK, me vendndodhje në Bashkinë Pogradec”. Aktualisht, nuk ka ende një vendimmarrje nga Këshilli Kombëtar i Territorit dhe Ujit (KKTU) për këtë aplikim. Theksojmë se në rast se zhvilluesi nuk plotëson kriteret ligjore të parashikuara në VKM-në e sipërcituar si dhe aktet e tjera ligjore në fuqi, aplikimi refuzohet,”- thotë AZHT për Report Tv.
Biznesmeni Fatmir Bektashi, edhe pse është në akuzë për dy vepra penale “korrupsion aktiv” dhe “pastrim parash” në dosjen “Partizani” dhe në dosjen e kryebashkiakut të arrestuar, Erion Veliaj, vijon aktivitetin e tij si ndërtues. Këtë herë Bektashi është larguar nga Tirana, aty ku ka ndërtuar komplekse të shumta pallatesh si në zonën e “21-Dhjetorit” ashtu edhe në “Ali Dem”.
Këtë herë, firma “Kontakt” e zotëruar nga Bektashi synon të ndërtojë shumë pranë zonës së mbrojtur të Drilonit në Pogradec.
Dhe mesa duket, lejen e ndërtimit e ka siguruar pasi në rrjetet sociale, kompania “Kontakt” ka nisur të reklamojë projektin që do të ngrihet në Tushemisht.Sipas projektit, në këtë zonë do të ndërtohet një kompleks i madh me tre kulla të larta dhe disa të tjera më të ulëta që do të kenë njësi banimi dhe shërbimi
