E ardhmja e Armando Brojës, sulmuesi i Kombëtares mund të përfundojë në… kategorinë e dytë

Armando Broja nuk po gjen “paqe” për sa i përket të ardhmes së tij. Sulmuesi shqiptar, mbylli një sezon jo fort pozitiv tek Evertoni, ku u aktivizua si i huazuar, teksa tashmë është duke kërkuar një aventurë të re.

Së fundmi ka dalë skenë një rikthim i mundshëm i Brojës te Sauthemptoni, që në edicionin e ardhshëm do të militojë në Championship, që është dhe kategoria e dytë angleze për nga renditja.  

“Shenjtorët” janë në kërkim të një sulmuesi, ndërsa Broja është në kërkim të një ekipi të ri. Për këtë fakt mediat britanike mendojnë se ribashkimi mes palëve nuk mund të konsiderohet një utopi. Vlen të theksohet fakti se Broja është aktivizuar me ekipin e Sauthemptonit në sezonin 21/22 ku luajti 38 ndeshje duke shënuar 9 gola dhe dhuruar dy asist.