Ilir Dobjani është momentalisht pa ekip, pasi mbylli aventurën e tij me Egnatian. Portieri kampion i Superiores në sezonin 2023-2024, tashmë është në kërkim të një aventure të re.
Ofertat për të nuk mungojnë, teksa interes ka pasur edhe nga Kosova. Por momentalisht, Dobjani ka zgjedhur që të stërvitet në kryeqytet, më saktë në kampin e Tiranës.
24-vjeçari momentalisht po stërvitet në kompleksin “Skënder Halili”, në shtëpinë e bardhebluve. Dobjani po mundohet të qëndrojë në “top formë”, duke u stërvitur krah trajnerit të portierë të Tiranës, Blendi Vashaku.
Është pikërisht ky i fundit, ai që ka publikuar foton në rrjetin social “Facebook”, ku shfaqet krah Dobjanit gjatë seancës stërvitore. Kujtojmë se Dobjani dhe Vashaku kanë punuar edhe më parë bashkë, tek Besa e Kavajës.
