Ish-kryebashkiakut të Shkodrës, Bardh Spahia i është komunikuar sot akuza e “shpërdorimit të detyrës” nga SPAK.
Bëhet fjalë për një kallëzim të bërë ndaj tij nga Mark Molla, ish-drejtori i Ujësjellësit të Shkodrës, i emëruar nga Voltana Ademi në limitet e lënies së detyrës së saj, dhe i shkarkuar menjëherë nga Spahia.
Molla pretendon në kallëzimin e tij se është shkarkuar padrejtësisht nga detyra.
Mark Molla është një personazh kontrovers, i dënuar me 8 vite burg për vjedhje, shpërdorim detyre dhe falsifikim të dokumenteve zyrtare. Ai gjithashtu ka qenë shënjestër e një plagosjeje me armë zjarri në derën e banesës së tij në Shkodër në vitin 2020.
Pas daljes nga SPAK, Spahia ka deklaruar se bëhet fjalë për një çështje administrative dhe se ka zbatuar vetëm ligjin.
