Teksa lufta në Gaza vijon, zia e bukës po afrohet në të gjithë Gazën. Hanadi Gamal Saed El Jamara, 38 vjeç, rrëfen për CNN se gjumi është gjithçka që mund t’i shpërqendrojë fëmijët e saj nga uria që gërryen barkun e tyre.
Këto ditë, nëna e shtatë fëmijëve e gjen veten duke lypur ushqim në rrugët e mbushura me baltë të Rafah, në Gazën jugore. Ajo përpiqet të ushqejë fëmijët e saj të paktën një herë në ditë, ndërsa kujdeset për burrin e saj, një pacient me kancer dhe diabet.
“Ne po vdesim ngadalë. Mendoj se është edhe më mirë të vdesim nga bombat, të paktën do të jemi dëshmorë. Por tani po vdesim nga uria dhe etja.”-reflektoi El Jamara, nëna në Rafah.
Njerëzit në Gazën veriore ‘hanë bar’ për të mbijetuar
Mohammed Hamouda, një terapist i zhvendosur në Rafah, kujton ditën kur kolegu i tij, Odeh Al-Haw, u vra duke u përpjekur të merrte ujë për familjen e tij. Al-Haw ishte në radhë në një stacion uji në kampin e refugjatëve Jabalya, në Gazën veriore, kur ai dhe dhjetëra të tjerë u goditën nga bombardimet izraelite, tha Hamouda.
“Fatkeqësisht, shumë të afërm dhe miq janë ende në Rripin verior të Gazës, duke vuajtur shumë. Ata hanë bar dhe pinë ujë të ndotur,”- tha Hamouda, baba i tre fëmijëve, për CNN.
Ndërsa Gaza shkon drejt urisë në shkallë të plotë , civilët e zhvendosur dhe punonjësit e shëndetësisë i thanë CNN se ata janë të uritur në mënyrë që fëmijët e tyre të mund të hanë atë pak që është në dispozicion. Nëse palestinezët gjejnë ujë, ai ka të ngjarë të mos pihet. Kur kamionët e ndihmës vijnë, njerëzit ngjiten mbi njëri-tjetrin për të rrëmbyer ndihmën. Fëmijët që jetojnë në rrugë, pasi janë detyruar të largohen nga shtëpitë e tyre nga bombardimet e Izraelit, qajnë dhe zihen për bukën e ndenjur. Të tjerë thuhet se ecin me orë të tëra në të ftohtë duke kërkuar ushqim, duke rrezikuar ekspozimin ndaj sulmeve izraelite.
Bombardimet dhe rrethimi i Izraelit që nga 7 tetori ka zvogëluar në mënyrë drastike furnizimet jetike në Gaza, duke e lënë të gjithë popullsinë prej rreth 2.2 milion të ekspozuar ndaj niveleve të larta të pasigurisë ushqimore ose më keq. Për më shumë se 100 ditë, palestinezët në Gaza kanë parë shpërngulje masive , lagje të kthyera në hi dhe rrënoja, familje të tëra të fshira nga lufta, një rritje të sëmundjeve vdekjeprurëse dhe sistemin mjekësor të shkatërruar nga bombardimet. Tani uria dhe dehidrimi janë kërcënimet kryesore për mbijetesën e tyre
