Një bisedë e nxehtë midis Donald Trump dhe Benjamin Netanyahut është zbuluar nga NBC News. Presidenti amerikan thuhet se e ngriti zërin dhe e ndërpreu papritur kryeministrin izraelit gjatë një telefonate shumë të tensionuar kur kryeministri izraelit këmbënguli se “nuk ka uri” në Rripin e Gazës. Incidenti, i cili ndodhi më 28 korrik, solli kulmin e tensioneve në rritje midis dy aleatëve, mes shqetësimeve të mëdha në lidhje me situatën humanitare në rajon.
Sipas një raporti zbulues nga NBC News, i cili bazohet në raportet e një zyrtari të lartë amerikan, dy ish-zyrtarëve amerikanë dhe një diplomati perëndimor, konfrontimi shpërtheu një ditë pasi Netanyahu bëri një deklaratë publike nga Jerusalemi gjatë së cilës ai siguroi: Nuk ka krizë urie në Gaza.
Trump, duke folur me gazetarët, pohoi se kishte parë imazhe të fëmijëve që “dukeshin shumë të uritur”.
“Është e qartë se atje ka uri të vërtetë – dhe nuk mund ta falsifikosh këtë.”
Deklarata e tij e shtyu Netanyahun të kërkonte një telefonatë.
Gjatë bisedës, thuhet se Netanyahu përsëriti se kriza e urisë ishte shpikur nga Hamasi për qëllime propagande. Sipas të njëjtave burime, Trump e ndërpreu papritur, ngriti zërin dhe i bërtiti: Nuk dua të dëgjoj më se uria është e rreme. Presidenti amerikan thuhet gjithashtu se deklaroi se kishte parë prova nga ndihmësit e tij që tregonin fëmijë që vdisnin urie. Megjithatë, zyra e Netanyahut mohoi kategorikisht çdo gjë që pretendohet se ka ndodhur gjatë telefonatës duke e cilësuar si “lajm të rremë”.
“Pretendimi për një përballje të supozuar verbale midis Kryeministrit Netanyahu dhe Presidentit Trump është plotësisht lajm i rremë.”
Një ish-zyrtar amerikan e përshkroi telefonatën si “të drejtpërdrejtë dhe të njëanshme”, duke vënë në dukje se Trump bëri foli pjesën më të madhe të bisedës, duke u përqendruar në situatën humanitare në Gaza. Thirrja erdhi mes paralajmërimeve të përsëritura nga OKB-ja se në Gaza kishte nisur zija e bukës. Agjencitë e ndihmës thonë se shumë familje po mbijetojnë me bukë dhe ujë, ndërsa imazhet dhe videot që qarkullojnë në internet përforcojnë pretendimet për kequshqyerje.
Pavarësisht thirrjeve ndërkombëtare, Netanyahu këmbëngul se Izraeli nuk po kufizon furnizimet me ushqim dhe akuzon Hamasin për manipulim të situatës. Pas bisedës së nxehtë me Trump, i dërguari special i SHBA-së për Lindjen e Mesme, Steve Witkoff, vizitoi rajonin me një mision për të koordinuar më mirë ofrimin e ndihmës humanitare.
