Refit, alias Nertil Buzi ka vrarë veten me armën e gjahut, brenda makinës në zonën e fshatin Kurjan të Fierit, disa kilometra larg vendit ku vra ish-vjehrrin, plagosin ish-vjehrrën dhe mori peng ish-të dashurën Rozalinda Plaku.
Kështu bën me dije Policia e Shtetit, e cila ka lëshuar një komunikatë zyrtare për shtyp për ngjarjen që tronditi mëngjesin e kësaj të premte opinionin publik.
Lirimi i pengut pa dëmtime dhe menaxhimi për orë të tëra i një situate me rrezik të lartë tregojnë rëndësinë e ekipit negociator të RENEA-s, të Policisë së Shtetit dhe të Prokurorisë në përpjekjen për të shmangur një bilanc edhe më tragjik.
“Në vijim të informacionit paraprak për ngjarjen e rëndë kriminale të ndodhur në fshatin Vidhisht, Roskovec, ku shtetasi Refit Buzi, 35 vjeç, vrau me armë gjahu babanë e ish-të dashurës së tij, plagosi nënën e saj dhe mori peng ish-të dashurën, shtetasen Rozalinda Plaku, ju informojmë se:
Pas lirimit të saj falë veprimeve profesionale të Policisë, ekipi negociator i RENEA-s, në bashkëpunim me shërbimet e Drejtorisë Vendore të Policisë Fier, nën drejtimin e Prokurorit, vijoi negociatat me 35-vjeçarin, me qëllim bindjen e tij për t’u dorëzuar dhe për të shmangur përshkallëzimin e mëtejshëm të situatës.
Pavarësisht negociatave intensive, të zhvilluara që prej orëve të para të mëngjesit, 35-vjeçari nuk iu bind thirrjeve të Policisë për t’u dorëzuar dhe, rreth orës 16:35, dyshohet se është vetëvrarë me armën e gjahut që mbante me vete, brenda automjetit”, njofton Policia e Shtetit.
Grupi hetimor, nën drejtimin e prokurorit, vijon veprimet për dokumentimin e plotë të rrethanave dhe shkaqeve të kësaj ngjarjeje të rëndë kriminale. Për më shumë se 5 orë, Forcat Speciale RENEA kanë tentuar ta bindin 35 vjeçarin të dorëzohej, por më kot, çdo tentativë ka dështuar.
Policia ka publikuar dhe pamjet nga aksioni për kapjen e tij.
