Ish-deputetë dhe kandidatë për deputetë të Partisë Demokratike, kryesisht ata të listës së hapur që morën shumë më tepër vota sesa emrat e listës së mbyllur, u mblodhën sot për të diskutuar mbi rrugëdaljet nga vakuumi politik ku ndodhet aktualisht PD-ja. Takimi, i parë nga shumë demokratë si lëvizja e parë e një grupimi të ri brenda opozitës, ka ngjallur debate të brendshme dhe interes të gjerë publik.
I pyetur për këtë mbledhje, kryetari i grupit parlamentar Gazment Bardhi u përpoq ta minimizojë rëndësinë e saj, duke deklaruar se “ky nuk është lajm pasi ata kanë qenë duke pirë thjesht kafe”.
Por burime të pranishme në takim tregojnë të kundërtën: mbledhja përfshinte emra të rëndësishëm të PD-së, të votuar drejtpërdrejt nga qytetarët, si Ilir Alimehmeti, Hysen Kadiu, Aulon Kalaja, Parid Mahmutaj e të tjerë — dhe diskutimet kishin të bënin me të ardhmen e opozitës dhe boshllëkun aktual drejtues.
Fakti që kreut të grupit parlamentar “nuk i bën përshtypje” që figura me legjitimitet të drejtpërdrejtë nga vota e qytetarëve mblidhen në mënyrë të pavarur, është në fakt shqetësues sepse ndërkohë ky takim informal ka marrë më shumë vëmendje se shumë prej mbledhjeve rutinë në selinë e zymtë të partisë — sinjal se një lëvizje e re brenda PD-së është në zanafillën e saj dhe pritet të zgjerohet në ditët në vijim.
