Armando Broja është gjithnjë e më larg Burnleyt. Sulmuesi i Kombëtares duket më i prirur drejt një lëvizje të re dhe do të shfrytëzojë pikërisht këtë dritare transferimi për të provuar një “strehë të re”.
Dhe zhvillimi më i fundit që vjen nga eksperti i merkatos në Itali, Gianluca Di Marzio, tregon për një tjetër skuadër që ka shprehur interesim për të përfituar shërbimet e shkodranit. Fjala është për Cagliarin, klubin që militon në elitën e futbollit italian, aty ku aktivizohet edhe futbollisti tjetër i Shqipërisë, portieri Alen Sherri.
Sipas të njëjtit burim në Itali, drejtuesit e ekipit nga Sardenja janë duke bërë vlerësimet dhe priten ditët në vijim për të kuptuar nëse do të ketë një lëvizje më shumë në radhët e tyre.
