Zohran Mamdani, politikani 34-vjeçar me prirje socialiste, ka arritur një fitore të papritur në zgjedhjet për kryetar bashkie të New York-ut, duke u bërë një figurë e re e majtë që u ngjit në skenën politike falë fushatës së tij të fuqishme në rrjetet sociale.
Me video të thjeshta, por të goditura, si hedhja në ujërat e akullta të Coney Island për të ironizuar çmimet e larta të qirave, apo ecja nëpër Manhattan për të treguar se qytetarët “meritojnë një kryetar që mund ta shohin e ta dëgjojnë”, Mamdani arriti të mobilizojë veçanërisht votuesit e rinj. Sipas sondazheve, tre të katërtat e votuesve nën moshën 30 vjeç e mbështetën atë, shkruan BBC.
Ekspertët thonë se strategjia e tij e komunikimit e paraqiti si një figurë autentike dhe të afërt me qytetarët, duke e dalluar nga politikanët tradicionalë. “Ai arriti të kombinojë humorin me biseda serioze, duke e bërë politikën tërheqëse për të rinjtë,” tha Jack Bratich, profesor gazetarie në Rutgers University.
Megjithatë, sfida e vërtetë për Mamdanin nis tani, pas betimit më 1 janar. Ai duhet të ruajë energjinë e fushatës dhe të mbajë të angazhuar mbështetësit e tij në qeverisjen e përditshme, një proces më pak emocionues se gara elektorale.
Marrëdhënia e tij me administratën Trump pritet të jetë vendimtare. Gjatë fushatës, Trump e quajti “ekstremist” dhe kërcënoi se do të ndalonte fondet federale për qytetin nëse Mamdani fitonte. Por një takim i papritur miqësor në nëntor tregoi se kryetari i ri mund të jetë i gatshëm për pragmatizëm.
Ndërkohë, mbështetësit e tij kanë themeluar një organizatë të re, Our Time for an Affordable NYC, e cila synon të përdorë rrjetin e gjerë të vullnetarëve për të shtyrë përpara agjendën e tij për përballueshmërinë e jetesës në qytet.
Ceremonia e betimit u mbajt në stacionin historik të metrosë City Hall, tashmë i braktisur. “Ky është nderi i jetës sime,” tha Mamdani. “Mezi pres të fillojmë mandatin tonë.”
