Një atentat ka ndodhur mbrëmjen e kësaj të shtune në Lezhë.
Nga të shtënat ka mbetur i plagosur rëndë në gjendje kritike për jetën Eno Nikulaj. Ai është djali i xhaxhait të biznesmenit Ardian Nikulaj, ky i fundit i ekzekutuar në lokalin e tij në Shëngjin më 19 prill të këtij viti. Biznesmeni u vra si pasojë e hasmërisë 26-vjeçare mes fisit Lekstakaj dhe Nikulaj.
Ndërkohë, më 19 korrik po të këtij viti, i ekzekutuar me armë zjarri po në Lezhë mbeti Nikolin Lekstakaj. Eno Nikulaj ishte një prej persona të dyshuar në këtë ngjarje.
Njoftimi i policisë:
Lezhë/Informacion paraprak
Rreth orës 21:30, në aksin rrugor “Lezhë-Shkodër”, në vendin e quajtur “Ura e trenit”, në rrethana ende të paqarta, është qëlluar me armë zjarri në drejtim të automjetit që drejtohej nga shtetasi E. N., 40 vjeç, banues në Shëngjin.
Si pasojë është plagosur shtetasi E. N., i cili është transportuar në gjendje shumë të rëndë, në spitalin e Lezhës, për ndihmë mjekësore.
Për këtë ngjarje është ngritur menjëherë një grup i posaçëm hetimor, si dhe janë ngritur pika kontrolli në të gjitha akset rrugore.
Ndërkohë, vijon intensivisht kontrolli i zonës.
