SHBA do të vendosë ndalimin e vizave për ekstremistët izraelitë në Bregun Perëndimor, ka konfirmuar Sekretari amerikan i Shtetit Antony Blinken.
Ai tha në një deklaratë se kufizimet do të synojnë ata që janë të përfshirë në dhunë ose veprime të tjera që kufizojnë aksesin e civilëve në shërbimet thelbësore dhe nevojat themelore, raporton “Sky News”.
Ato gjithashtu mund të zbatohen për anëtarët e familjes së individëve, tha Blinken.
Kryediplomati amerikan kishte paralajmëruar më herët se SHBA-ja do të merrte masa për sulmet ndaj palestinezëve në Bregun Perëndimor.
Departamenti i Shtetit tha se politika e kufizimeve do të ndikojë te dhjetëra individë dhe anëtarë të familjeve të tyre.
Ndalimet e para do të ndodhin nga sot dhe çdo shtetas izraelit me një vizë ekzistuese amerikane të synuar si pjesë e politikës së re do të njoftohet se viza e tij është revokuar, tha departamenti.
