11 zyrtarë të burgut të Peqinit dhe drejtori janë lënë “arrest me burg” nga Gjykata e Elbasanit, pas vrasjes me armë zjarri brenda ambienteve të burgut.
Në burg është lënë edhe drejtori provizor i burgut, Kamber Hoxha, ndërsa vetëm për një gardian është dhënë masa “detyrim paraqitje”.
I dënuari me burgim të përjetshëm Sokol Mjacaj, kishte arritur të siguronte një pistoletë me të cilën qëlloi për vdekje Arben Lleshin dhe plagosi një të burgosur tjetër.
Dyshohet se dështimi i sigurisë në burg, mosfunksionimi i skanerëve dhe disa kamerave, e lehtësuan futjen e armës së zjarrit.
Ndërsa në gjykatë, drejtori i përkohshëm, Kamber Hoxha ka deklaruar se burgu i Peqinit ishte shndërruar në një hotel dhe kishte probleme serioze me sigurinë.
