Tomas Guidara njihet gjerësisht nga shqiptarët, si një dëshirë e hershme ish-trajnerit të Kombëtares shqiptare, Christian Panucci. Ndërkohë që së fundmi, arbëreshi i Argjentinës ka fituar edhe interesin e Sylvinhos, por deri më tani asgjë s’ka ndodhur.
Mbrojtësi 29-vjeçar që luan momentalisht me Huracan në Argjentinë, ka pësuar një ndryshim të rëndësishëm në website-n e njohur “Transfermarkt”. Këta të fundit, i kanë shtuar Guidarës edhe flamurin shqiptar, përveç atij argjentinas që e mbante prej kohësh duke e bërë edhe shtetas shqiptar.
Cilësitë e tij janë të një niveli të kënaqshëm, gjë që ka bërë që as ofertat europiane të mos mungojnë. Hamburg dhe Bochum në Gjermani kanë shfaqur interesim serioz për shërbimet e tij, por ende s’ka asgjë konkrete.
Pritet të shihet nëse flamuri shqiptar në profilin e tij në “Transfermarkt”, do të ndikojë në zgjedhjen e tij në rang kombëtaresh apo jo.
