Aktori turk Burak Ozçivit, i njohur nga publiku shqiptar si “Osmani”, përveç roleve të tij të pëlqyera nga shqiptarët, duket se nuk do ti ndahet Shqipërisë, këtë herë jo në ekrane por në fushën e biznesit.
Në mbledhjen e djeshme (30 qershor), Këshilli i Ministrave miratoi disa vendime të rëndësishme, mes tyre transferimin e 88.5 hektarëve tokë shtetërore në Vlorë në dispozicion të kompanisë “RAMS Albania”, e cila do të ndërtojë aty një zonë të lirë ekonomike. Kompania rezulton në pronësi të Mehmet Faruk Burbul, pronari i korporatës ndërkombëtare “RAMS Global” me seli në Almaty të Kazakistanit.
Në vendimin e qeverisë thuhet se 88.5 hektarëve tokë shtetërore në Vlorë do të vihen në dispozicion për zhvillimin dhe realizimin e projektit të investimit strategjik “Vlorë TEDA/RAMS Free Zone”.
Por çfarë e lidh RAMS Global me aktorin?
Nga kërkimet e ZËRI rezulton se prej muajit mars 2025 aktori turk Burak Ozçivit është imazh dhe partner i RAMS Global. Bashkëpunimi mes tyre u bë zyrtar nga vetë kompania, ku njoftohej se Burak Özçivit u bë pjesë e grupit RAMS Global me Pavilion by RAMS, projekt në Irakun e Veriut, dhe projektin në Kazakistan, RAMS Beyond Almaty.
Vetë aktori turk i njohur për publikun shqiptar, në verën e vitit 2025 vendosi të kalonte pushime në Shqipëri, ku në Vlorë u prit edhe nga kryebashkiaku i asokohe Ermal Dredha. Ish-kryetari i Bashkisë deklaronte se përmes postimi në rrjetet sociale se yllit të telenovelave turke, Vlora i la mbresa të shkëlqyera.
“Deri sot, nuk kisha parë kaq shumë njerëz në Vlorë, të prisnin në radhë, për të bërë një fotografi me Burak Özçivit. Kënaqësi ta prisja sot në zyrë, bashkë me stafin e bashkisë, dhe të kalonim kohë në Vlorën që i la mbresa të shkëlqyera! Na bënë bashkë projektet që kanë qëllim promovomin e Vlores si destinacion turistik dhe jo vetëm”, shkruante Dredha krah fotove të publikuara.
Vizita në Shqipëri e Burak Ozçivit u komentua tepër, ndërsa nuk dihet nëse ditët e tij në Vlorë ishin vetëm për arsye pushimi apo për motive biznesi, si partner i kompaninë ‘RAMS’./ZËRI
